6 qarasha kúni Máskeýde mánerlep syrǵanaýdan Gran-pri seriiasynyń besinshi kezeńi bastaldy. «Megasport» muz aidynynda qaiǵyly jaǵdaida ómirden ozǵan qazaqstandyq mánerlep syrǵanaýshy, Olimpiada oiyndarynyń júldegeri Denis Tendi eske alýǵa arnalǵan plakattar men bannerler ilindi. Bul týraly QazAqparat Qazaqstannyń Resei Federatsiiasyndaǵy Elshiliginiń resmi saityna silteme jasap habarlaidy.
Atap ótilgendei, 15 qarashada sportshylardyń jattyǵýlary ótti. Keiin jankúierler «Megasport» muz aidynynda qazaqstandyq sportshy Denis Tenge arnalǵan bannerlerdi ilip qoiǵan.
Sondai-aq juma kúni atalmysh týrnirdiń ashylý saltanatynda ózbekstandyq mánerlep syrǵanaýshy Misha Ge Deniske arnalǵan nomermen óner kórsetti. Ózbek sportshysy Denis Tenniń mýzykasyna jazylǵan baǵdarlamany usyndy. Onyń videosy Youtube arnasynda jariialandy.
Sport.kz saitynyń jazýynsha, Máskeýdegi Gran-pri týrnirine Denis Ten de qatysýy tiis bolǵan.
Aita keteiik, bairaqty dodaǵa qyzdar arasynda qazaqstandyq sportshy, Aziia oiyndarynyń qola júldegeri Elizabet Túrsynbaeva qatysýda. Ol qysqa baǵdarlamadan keiin tórtinshi orynda keledi. Budan erterekte E.Tursynbaeva Kanadada Gran-pri seriiasynyń ekinshi kezeńine qatysyp, besinshi orynǵa ie bolǵan edi.
Eske sala keteiik, qazaqstandyq mánerlep syrǵanaýshy Denis Ten biyl 19 shilde kúni pyshaq jaraqatynan kóz jumdy. Oqiǵa Almatyda Qurmanǵazy men Baiseiitova kósheleriniń qiylysynda saǵat 15:00 shamasynda boldy. Sportshy kóliginiń ainasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denis Tenge pyshaq suǵyp alǵan. Ol oń jaq sanynyń joǵarǵy tusynan jaraqat aldy. 25 jastaǵy Ten úsh litr qan joǵaltyp, aýrýhanaǵa óte aýyr jaǵdaida jetkizildi.
2,5 saǵatqa jalǵasqan reanimatsiialyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olimpiada júldegeri qaitys boldy.
Adam óltirý babymen qylmystyq is qozǵaldy. Keiin belgili bolǵandai, sportshynyń ólimine qatysy bar kúdiktiler ustalyp, qylmystaryn moiyndady.
Ustalǵan úsh adamdy qamaýda ustaý merzimi 22 qarashaǵa deiin uzartyldy.
