6 قاراشا كٷنٸ مەسكەۋدە مەنەرلەپ سىرعاناۋدان گران-پري سەريياسىنىڭ بەسٸنشٸ كەزەڭٸ باستالدى. «مەگاسپورت» مۇز ايدىنىندا قايعىلى جاعدايدا ٶمٸردەن وزعان قازاقستاندىق مەنەرلەپ سىرعاناۋشى, وليمپيادا ويىندارىنىڭ جٷلدەگەرٸ دەنيس تەندٸ ەسكە الۋعا ارنالعان پلاكاتتار مەن باننەرلەر ٸلٸندٸ. بۇل تۋرالى قازاقپارات قازاقستاننىڭ رەسەي فەدەراتسيياسىنداعى ەلشٸلٸگٸنٸڭ رەسمي سايتىنا سٸلتەمە جاساپ حابارلايدى.
اتاپ ٶتٸلگەندەي, 15 قاراشادا سپورتشىلاردىڭ جاتتىعۋلارى ٶتتٸ. كەيٸن جانكٷيەرلەر «مەگاسپورت» مۇز ايدىنىندا قازاقستاندىق سپورتشى دەنيس تەنگە ارنالعان باننەرلەردٸ ٸلٸپ قويعان.
سونداي-اق جۇما كٷنٸ اتالمىش تۋرنيردٸڭ اشىلۋ سالتاناتىندا ٶزبەكستاندىق مەنەرلەپ سىرعاناۋشى ميشا گە دەنيسكە ارنالعان نومەرمەن ٶنەر كٶرسەتتٸ. ٶزبەك سپورتشىسى دەنيس تەننٸڭ مۋزىكاسىنا جازىلعان باعدارلامانى ۇسىندى. ونىڭ ۆيدەوسى Youtube ارناسىندا جارييالاندى.
Sport.kz سايتىنىڭ جازۋىنشا, مەسكەۋدەگٸ گران-پري تۋرنيرٸنە دەنيس تەن دە قاتىسۋى تيٸس بولعان.
ايتا كەتەيٸك, بايراقتى دوداعا قىزدار اراسىندا قازاقستاندىق سپورتشى, ازييا ويىندارىنىڭ قولا جٷلدەگەرٸ ەليزابەت تٷرسىنباەۆا قاتىسۋدا. ول قىسقا باعدارلامادان كەيٸن تٶرتٸنشٸ ورىندا كەلەدٸ. بۇدان ەرتەرەكتە ە.تۇرسىنباەۆا كانادادا گران-پري سەريياسىنىڭ ەكٸنشٸ كەزەڭٸنە قاتىسىپ, بەسٸنشٸ ورىنعا يە بولعان ەدٸ.
ەسكە سالا كەتەيٸك, قازاقستاندىق مەنەرلەپ سىرعاناۋشى دەنيس تەن بيىل 19 شٸلدە كٷنٸ پىشاق جاراقاتىنان كٶز جۇمدى. وقيعا الماتىدا قۇرمانعازى مەن بايسەيٸتوۆا كٶشەلەرٸنٸڭ قيىلىسىندا ساعات 15:00 شاماسىندا بولدى. سپورتشى كٶلٸگٸنٸڭ ايناسىن ۇرلاماق بولعان ەكٸ ادامنىڭ ٷستٸنەن تٷسكەن. ارادا باستالعان جانجالدىڭ سالدارىنان ۇرىلار دەنيس تەنگە پىشاق سۇعىپ العان. ول وڭ جاق سانىنىڭ جوعارعى تۇسىنان جاراقات الدى. 25 جاستاعى تەن ٷش ليتر قان جوعالتىپ, اۋرۋحاناعا ٶتە اۋىر جاعدايدا جەتكٸزٸلدٸ.
2,5 ساعاتقا جالعاسقان رەانيماتسييالىق شارالارعا قاراماستان, اۋرۋحانا دەرٸگەرلەرٸ ونىڭ ٶمٸرٸنە اراشا تٷسە المادى. ساعات 17.30-دا وليمپيادا جٷلدەگەرٸ قايتىس بولدى.
ادام ٶلتٸرۋ بابىمەن قىلمىستىق ٸس قوزعالدى. كەيٸن بەلگٸلٸ بولعانداي, سپورتشىنىڭ ٶلٸمٸنە قاتىسى بار كٷدٸكتٸلەر ۇستالىپ, قىلمىستارىن مويىندادى.
ۇستالعان ٷش ادامدى قاماۋدا ۇستاۋ مەرزٸمٸ 22 قاراشاعا دەيٸن ۇزارتىلدى.
