20 aqpan kúni Máskeý soty soǵys ardageri Ignat Artemenkoǵa jala jabý isi boiynsha Kreml synshysy Aleksei Navalnyiǵa 850 myń rýbl (shamamen 4,8 million teńge) aiyppul saldy.
Byltyr jazda bilikshik Russia Today telearnasy Resei konstitýtsiiasyn ózgertýdi qoldaityn rolik jariialap, onda Ekinshi dúniejúzilik soǵys ardageri Ignat Artemenkonyń sózi berilgen. Oppozitsiialyq saiasatker osy rolikti synai otyryp, oǵan túsken adamdardy "paraqor malailar men satqyndar" dep ataǵan. Bilik saiasatkerdiń sózin soǵys ardagerine jala jabý dep baǵalap, is qozǵaǵan.
Sýdia Vera Akimova aiaqtalǵan tyńdalymdardyń materialdaryn Máskeý tergeý komitetine joldaý týraly sheshim qabyldaǵanyn málimdedi. Onyń sózinshe, tergeý komiteti Navalnyidyń sot protsesi kezindegi "qorlaý sózderin" tekserýi tiis.
Sol kúni Máskeý qalalyq soty Simonov aýdandyq sotynyń Navalnyidyń 2014 jylǵy isi boiynsha kesilgen shartty jazasyn túrme jazasyna aýystyrý týraly sheshimin kúshinde qaldyrdy. Bul týraly Azattyq radiosy Orys qyzmetiniń tilshisi habarlady.
Máskeý qalalyq soty Navalnyidyń úiqamaqta ótkizgen ýaqytyn, "Matrosskaia tishina" tergeý abaqtysynda ótkizgen bir aiyn eskerip, oppozitsionerdiń merzimin 2 jyl 5 aiǵa deiin qysqartty.
2014 jyly sot Aleksei Navalnyiǵa alaiaqtyq jasaǵan degen aiyppen 3,5 jylǵa shartty jaza kesip, bes jylǵa synaq merzimin (keiin ony taǵy bir jylǵa uzartqan) taǵaiyndaǵan. 2021 jylǵy aqpanda sot Resei federaldyq jazany atqarý qyzmetiniń suraýy boiynsha Navalnyidyń shartty jazasyn qamaý jazasyna aýystyrýdy uiǵarǵan. Federaldyq qyzmet saiasatkerdiń jazany óteý shartyn buzyp, boi jasyrǵanyn aitady. Aleksei Navalnyi 2020 jylǵy 20 tamyzda Tomskiden Máskeý bara jatqan ushaqtyń bortynda esinen tanyp, aldymen Omby aýrýhanasyna, keiin Germaniiadaǵy "Sharite" klinikasyna jetkizilgen. Saiasatker qyrkúiektiń basynda komadan shyǵyp, esin jidy, odan keiin birneshe aida Germaniiada júrip saýyqtyrý emin qabyldady.
