2 aqpanda Máskeýdegi Simonovskii soty reseilik oppozitsioner Aleksei Navalnyiǵa sheshim shyǵaryp, oǵan úsh jarym jyl túrme jazasyn taǵaiyndady. Sot Navalnyidyń 2014 jyly tergeý izoliatorynda otyrǵan merzimin jáne 2021 jyldyń 17 qańtarynan beri qamaýda otyrǵan ýaqytyn alyp tastady. Oppozitsioner qamaýda 2 jyl 8 ai otyrady.
Navalnyidyń ústinen Qylmystyq jazany atqarý federaldyq qyzmeti (FSIN) shaǵym túsirip, sottan Navalnyidyń "Iv Roshe" isi boiynsha úsh jarym jyldyq shartty jazasyn túrme jazasyna aýystyrýdy suraǵan (Saiasatker 2014 jyly "Iv Roshe" kompaniiasynan aqsha jymqyrdy dep 3,5 jylǵa shartty jaza alǵan edi).
FSIN Navalnyi úsh jarym jyldyq shartty jaza aiasynda "politsiiaǵa kelip belgilený shartyn buzdy" dep aiyptaidy.
Sotta Navalnyi Berlindegi aýrýhanada emdelip jatqandyqtan "politsiiaǵa kele almaǵanyn" aitty.
"Komada jattym, densaýlyq jaǵdaiym men jatqan jerim jaily barlyq qujatty jiberdim. Keiin ushaqpen [Reseige] keldim. Taǵy ne isteýim kerek edi? Úiime kelgende bolmady deisizder. Árine, úide bolmadym. Taǵy ne istei alamyn?" dedi Navalnyi sotta.
Oppozitsionerdiń bul sózine FSIN ókili "vedomstvo saitynda kórsetilgen telefonǵa habarlasý kerek edi" dep jaýap berdi.
Sottaǵy úzilis kezinde Navalnyi "buǵan býnkerde turyp jatqan bir adamnyń jek kórýshiligi men qorqynyshy sebep" dedi.
Eki tarap sot sheshimine shaǵym túsire alady.
- Navalnyi byltyr tamyzda Tomsk qalasynan Máskeýge ushyp bara jatqanda jaǵdaiy kúrt nasharlap, Omby qalasyndaǵy aýrýhanaǵa jetkizilgen. Keiin onyń ýlanǵany belgili bolǵan. Es-tússiz jatqan Navalnyi Germaniia biligi jibergen arnaiy ushaqpen Berlinge jetkizilip, sol jaqta birneshe ai emdeldi.
- 17 qańtarda ol Germaniiadan Reseige oralǵan edi. Resei politsiiasy Navalnyidy Máskeýdegi Sheremetevo áýejaiynan ustap áketken. Osy kúni politsiia Navalnyidy kútip alýǵa kelgen jetpiske jýyq adamdy ustady.
- 18 qańtarda Máskeýdegi sot Navalnyidy 30 kúnge qamaýǵa aldy. Sotqa deiin saiasatkerge advokaty jiberilmedi. Qorǵaýshylarǵa sot bolatyny jaily otyrys bastalar sátte habarlandy. Navalnyi bul jaitty "zańsyzdyqtyń shekten shyqqan sáti" dedi. Sotta IIM ókili Navalnyi shartty jazasy úshin politsiiaǵa birneshe ret belgilenbedi dedi.
- Navalnyi qamaýda otyrǵanda ol basqaratyn "Jemqorlyqpen kúres qory" "Pýtin saraiy" atty zertteýin shyǵardy. Zertteýde Resei prezidenti Pýtinniń Gelendjikte záýlim saraiy bary aitylady.
- 23 jáne 31 naýryzda Reseide myńdaǵan adam Navalnyidy bosatýdy talap etip narazylyqqa shyqty. Jurt eldegi jemqorlyqqa da qarsylyq bildirdi. 23 qańtardaǵy mitingide politsiia tórt myń adamdy, 31 qańtarda 5,3 myń adamdy ustady.
- Eki mitingiden keiin Resei biligi belsendilerge, quqyq qorǵaýshylarǵa, oppozitsonerlerge qarsy qyryqtai qylmystyq is qozǵady. Osy istiń aiasynda politsiia qylmystyq is qozǵalǵandardyń úiin tintip, keibirin qamaýǵa aldy.
- Eýroparlament pen AQSh Resei biliginen Navalnyidy bosatýdy talap etedi.
