Máskeýdiń arbitrajdyq soty BTA Banktiń burynǵy basshysy Muhtar Ábiliazovtan 420 mln dollar óndirip alý boiynsha atalmysh banktiń shaǵymyn qanaǵattandyrdy, dep habarlaidy RAPSI.
Máskeý arbitrajdyq sotynyń anyqtamasynda kórsetilgendei, sot BTA banktiń burynǵy basshysy Muhtar Ábiliazovtan 420 million dollarǵa jýyq qarjyny óndirip alý boiynsha London joǵarǵy sotynyń sheshimin RF aýmaǵynda taný jáne oryndaý týraly BTA Banktiń ótinishin qanaǵattandyrdy.
Bul sheshimge bir aidyń ishinde Máskeý arbitrajdyq sotyna shaǵym túsirýge bolady.
2012 jyldyń 23 qarasha kúni London joǵarǵy soty BTA Banktiń Ábiliazovqa, Roman Solodchenkoǵa, Drey Associates Limited, Interfunding Facilities Limited, «AMK-Invest» jobalaý-qurylys kompaniiasy» JShQ, «TýranAlem Kapital» JShQ jáne Zrl Beteiligungs AG kompaniialaryna qatysty túsirgen shaǵymy boiynsha sheshim shyǵardy.
Qazaqstandyq bank Máskeý arbitrajdyq sotynan Muhtar Ábiliazovqa qatysty London joǵarǵy sotynyń shyǵarǵan sheshimin RF aýmaǵynda moiyndaý týraly ótinish bildirdi.
Eske sala keteiik, BTA banktiń burynǵy basshysy Muhtar Ábiliazov Qazaqstanda, Reseide jáne Ýkrainada barlyǵy 11 bap boiynsha aiyptaldy. 2009 jyldyń 6 naýryzynda Ábiliazov halyqaralyq izdeýge jariialandy. Sebebi oǵan jáne ol basshylyq etken qylmystyq topqa senip tapsyrylǵan múlikti iemdengendigi jáne talan-tarajǵa salǵandyǵy, aldaý jáne senimge qiianat keltirý arqyly bóten múlikti urlaǵandyǵy, zańsyz jolmen tabylǵan aqsha qarajattaryn zańdastyrǵandyǵy, bank qarajattaryn zańsyz paidalanǵandyǵy, ókilettikti asyra paidalanǵandyǵy jáne qylmystyq topqa basshylyq etkendigi boiynsha (Qazaqstan Respýblikasy Qylmystyq kodeksiniń 176-baby 3-bóliginiń «b» tarmaǵymen, 176-baby 3-bóliginiń «a», «b» tarmaqtary boiynsha - 24-babynyń 3-bóligimen, 177-baby 3-bóliginiń «a», «b» tarmaqtarymen, 193-baby 3-bóliginiń «b», «v» tarmaqtarymen, 220-babynyń 1-bóligimen, 228-babymen, 235-baby 3-bóligimen qarastyrylǵan) aiyptar taǵylǵan bolatyn.
Qazirgi tańda BTA bankiniń eks-basshysy Muhtar Ábiliazov pen onyń sybalastaryna qatysty is sotqa joldandy.
