Sergei Riabkov, Resei syrtqy ister ministriniń orynbasary.
Resei AQSh-tyń bolashaq prezidenti Donald Tramptyń Reseige iadrolyq qarý-jaraqty azaitý týraly kelisim jasasyp, esesine sanktsiialardy joiý týraly usynysyn qabyldamai tastady.
Resei syrtqy ister ministriniń orynbasary Sergei Riabkov 16 qańtarda BUU-nyń Niý-Iorktegi shtab-páterinde Máskeý AQSh-pen iadrolyq qarýsyzdaný boiynsha sóilesýge daiyn ekenin, biraq qarý-jaraqty qadaǵalaý máselesi sanktsiialardy joiý jónindegi kelissózben birge qaralmaitynyn málimdedi.
"Sanktsiialar boiynsha dialog bolmaidy. Biz eshqashan sanktsiialarǵa qatysty qandai da bir sharttardy talqylaǵan emespiz jáne qazir de ondai nietimiz joq. Ol sanktsiialardyń barlyǵy oidan shyǵarylǵan jáne zańsyz syltaýlarmen salynǵan" dedi Riabkov.
Sergei Riabkov Reseidiń iadrolyq qarýdy azaitý jaiynda kelissózge daiyn ekenin aitqanymen, Máskeý sanktsiialardyń joiylýy úshin qarýlaný máselesinde sheginis jasamaitynyn eskertti.
"Dialogsyz eshnárse oryndalmaidy, biraq Máskeý qandai da bir sebepterge bola óziniń qorǵanys salasyndaǵy ustanymyn ózgertedi deý ańǵaldyq bolar edi. Mundai ustanym usaq-túiek esepke qurylmaǵan, ol Reseidiń ulttyq múddelerin túisinýmen bailanysty" dedi Riabkov.
