سەرگەي ريابكوۆ, رەسەي سىرتقى ٸستەر مينيسترٸنٸڭ ورىنباسارى.
رەسەي اقش-تىڭ بولاشاق پرەزيدەنتٸ دونالد ترامپتىڭ رەسەيگە يادرولىق قارۋ-جاراقتى ازايتۋ تۋرالى كەلٸسٸم جاساسىپ, ەسەسٸنە سانكتسييالاردى جويۋ تۋرالى ۇسىنىسىن قابىلداماي تاستادى.
رەسەي سىرتقى ٸستەر مينيسترٸنٸڭ ورىنباسارى سەرگەي ريابكوۆ 16 قاڭتاردا بۇۇ-نىڭ نيۋ-يوركتەگٸ شتاب-پەتەرٸندە مەسكەۋ اقش-پەن يادرولىق قارۋسىزدانۋ بويىنشا سٶيلەسۋگە دايىن ەكەنٸن, بٸراق قارۋ-جاراقتى قاداعالاۋ مەسەلەسٸ سانكتسييالاردى جويۋ جٶنٸندەگٸ كەلٸسسٶزبەن بٸرگە قارالمايتىنىن مەلٸمدەدٸ.
"سانكتسييالار بويىنشا ديالوگ بولمايدى. بٸز ەشقاشان سانكتسييالارعا قاتىستى قانداي دا بٸر شارتتاردى تالقىلاعان ەمەسپٸز جەنە قازٸر دە ونداي نيەتٸمٸز جوق. ول سانكتسييالاردىڭ بارلىعى ويدان شىعارىلعان جەنە زاڭسىز سىلتاۋلارمەن سالىنعان" دەدٸ ريابكوۆ.
سەرگەي ريابكوۆ رەسەيدٸڭ يادرولىق قارۋدى ازايتۋ جايىندا كەلٸسسٶزگە دايىن ەكەنٸن ايتقانىمەن, مەسكەۋ سانكتسييالاردىڭ جويىلۋى ٷشٸن قارۋلانۋ مەسەلەسٸندە شەگٸنٸس جاسامايتىنىن ەسكەرتتٸ.
"ديالوگسىز ەشنەرسە ورىندالمايدى, بٸراق مەسكەۋ قانداي دا بٸر سەبەپتەرگە بولا ٶزٸنٸڭ قورعانىس سالاسىنداعى ۇستانىمىن ٶزگەرتەدٸ دەۋ اڭعالدىق بولار ەدٸ. مۇنداي ۇستانىم ۇساق-تٷيەك ەسەپكە قۇرىلماعان, ول رەسەيدٸڭ ۇلتتىق مٷددەلەرٸن تٷيسٸنۋمەن بايلانىستى" دەدٸ ريابكوۆ.
