Karantin rejimin qatań saqtaý - árbir azamattyń jáne biznes sýbektisiniń mindeti. Bul týraly QR memlekettik bas sanitarlyq dárigeri Aijan Esmaǵambetova aitty, dep habarlaidy QazAqparat.
Karantin rejimin qatań saqtaý árbir azamattyń jáne biznes sýbektisiniń mindeti - Esmaǵambetova
«Óńirlerdegi jedel shtabtardyń janynan qurylǵan monitoring toptary bekitilgen rejimdi buzý faktilerin anyqtap jatyr. Máselen, Nur-Sultan qalasynda 358 nysan tekserildi. Onyń ishinde 85 paiyzy bekitilgen talaptardy saqtamaidy. Atap aitqanda, 116 azyq-túlik jáne 94 azyq-túlik emes taýarlary dúkeniniń satýshylary maskasyz, qolǵapsyz, arnaiy kiimsiz jumys istegen. Qoǵamdyq tamaqtaný oryndary, tis emhanasy, shashtarazdar men sulýlyq salondary da qaýipsizdik sharalaryn saqtamaǵan. Buǵan qosa, Nur-Sultan qalasynda qyzmet kórsetý salasy personaldary arasynda koronavirýs jaǵdailary kún saiyn tirkeletindigin atap ótkim keledi», - dedi búgin elimizdiń bas sanitarlyq dárigeri Ortalyq kommýnikatsiialar qyzmetindegi brifingte.
Onyń dereginshe, Almaty qalasynda «Salavat stroi» JShS-niń qurylys alańyn tekserý barysynda bekitilgen talaptyń jartysynan kóbiniń saqtalmaityny anyqtalǵan. Azyq-túlik dúkenderi nan jáne nan ónimderin saqtaý erejesin buzǵan. Sulýlyq salondary men qoǵamdyq tamaqtaný oryndarynda adamdardyń kútý alańynda shoǵyrlanýy tirkelgen.
«Karantin rejimin qatań saqtaý árbir azamattyń jáne biznes sýbektisiniń mindeti. Kásipkerlik sýbektileri talaptardy buzǵany úshin ákimshilik jaýapkershilikke tartylyp, nysan jumysy toqtatylýy da múmkin. Aiyppul kólemi 5-ten 500 AEK-ke deiingi somany quraidy», - dedi Aijan Esmaǵambetova.
