Densaýlyq saqtaý ministri Aleksei Tsoi qazaqstandyqtardyń qashan maskasyz ómirge orala alatynyn aitty, dep habarlaidy "Ult aqparat".
«Ol úshin biz halyqtyń negizgi bóligine ekpe jasap úlgerýimiz kerek. Jospar boiynsha vaktsinalaýdy kúzdiń basyna qarai aiaqtaý jospary bar. Qyrkúiekte azamattarǵa barynsha kóp ekpe jasaýymyz kerek. Kórip otyrsyzdar, Amerika Qurama Shtattaryndaǵy, Izraildegi jaǵdai halyqtyń negizgi bóligin vaktsinalaǵannyń arqasynda birshama jaqsardy. Azamattardyń 60 paiyzyna deiin vaktsina salǵandyqtan, maskasyn sheship, qalypty ómirge oralyp jatyr. Ujymdyq immýnitet bolǵanda azamattar bir-birin virýstan qorǵai alady. Al qazir bizde vaktsina alǵannyń ózinde maskany sheshse, aýrý juqtyrý táýekeli bar. Óitkeni negizgi bóligi vaktsina alyp bitken joq. Vaktsina degenimiz – virýs adamnan adamǵa juqqan kezde ekpe alǵan adamnan aýrý juqtyrý tizbegin úzetin quraly», - deidi ministr.
Aleksei Tsoi kúzge deiin halyqtyń 60 paiyzy vaktsina alsa, qalypty ómirge oralý múmkin ekenin aitty.
«Vaktsina alǵan adamnyń sany neǵurlym kóp bolsa, virýstyń taralý múmkindigi soǵurlym taryla túsedi. Sondyqtan kúzge deiin azamattardyń 60 paiyzyn vaktsinamen qamtýǵa tyrysamyz. Sonda ǵana biz maska rejimin kezeń-kezeńmen ala bastaimyz. Otandastarymyzdy tegin vaktsina alýǵa shaqyramyz. Qazaqstannyń vaktsinany tegin usynyp otyrǵany da jetistik. Áitpese aqyly ekpe salyp jatqan elder de bar», - dedi Densaýlyq saqtaý ministri.
