Foto: Skrinshot/instagram.com/akapenov
Telegram-daǵy Kozachkov arnasynda jariialanǵan málimetke sáikes, burynǵy UQK tóraǵasy Kárim Másimovtiń burynǵy kúieý balasy Azamat Qapenovke qatysty birneshe eldiń quqyq qorǵaý organdary tergeý júrgizip jatyr, dep habarlaidy Ult.kz.
Jazba avtorynyń málimetinshe, Azamat Qapenov qazirgi tańda Qarjylyq monitoring agenttiginiń halyqaralyq izdeýinde júr. Sonymen qatar, ony Sybailas jemqorlyqqa qarsy qyzmet te 2024 jyldan beri izdep keledi. Ol alaiaqtyq jáne qyzmettik ókilettikterdi asyra paidalaný isteri boiynsha kúdikke ilingen.
Kozachkov arnasynyń jazýynsha, tergeý «Qaztemirtrans» AQ qyzmetine bailanysty qozǵalǵan. Áńgime 2015 jyly belgili bir kompaniialarǵa shamamen 5 milliard teńge kóleminde jeńildikter berý máselesi tóńireginde bolǵan. Is 2016 jyly toqtatylǵanymen, 2025 jyly Bas prokýratýra onyń kúshin joiyp, tergeý qaita jandanǵan.
Avtordyń aitýynsha, Qapenov 2015 jyly Másimovtiń qyzy Támilla Kárimge úilengennen keiin temirjol salasyndaǵy yqpalyn kúsheitken. Sol kezeńde júk tasymaly naryǵyna qatysýshylar onyń kei kompaniialarǵa erekshe jaǵdai jasap, ózgelerge qysym kórsetkenin aitqan.
Sondai-aq jazbada Azamat Qapenovtiń ár jyldary Resei men Qyrǵyzstan azamattyǵyn alǵany, al 2024 jyly BAÁ rezidenti mártebesine ie bolǵany aitylǵan. Bul jaǵdai onyń Qazaqstanǵa ekstraditsiialanýyn qiyndatýy múmkin ekeni kórsetiledi.
Telegram-arna málimetinshe, Qapenov byltyr Qazaqstannyń suraýy boiynsha BAÁ aýmaǵynda ustalǵanymen, keiin Qyrǵyzstanǵa ketken. Qazirgi tańda ol sol elde júrgeni aitylady.
Budan bólek, Kozachkov jazbasynda «Qaztemirtrans» isine qatysy bar Pavel Iýngke qatysty da Qyrǵyzstan quqyq qorǵaý organdarynyń qyzyǵýshylyq tanytqany sóz bolady.
