Bas prokýratýra Ulttyq qaýipsizdik komitetiniń burynǵy basshylaryna qatysty qylmystyq isti zerdeleý nátijesi boiynsha tergeý organynyń aiyptaý aktisin bekitti, dep habarlaidy "Ult aqparat" vedomstvonyń baspasóz qyzmetine silteme jasap.
Qylmystyq is Astana qalasynyń Qylmystyq ister jónindegi mamandandyrylǵan aýdanaralyq sotyna qaraý úshin joldandy.
"Aiyptalýshylar K.Q. Másimov (UQK-niń burynǵy tóraǵasy) jáne A.T. Sadyqulov (UQK tóraǵasynyń burynǵy orynbasary) memleketke opasyzdyq jasaý (QK 175-babynyń 1-bóligi), bilikti kúshpen basyp alý (QK 179-babynyń 3-bóligi), aýyr zardaptarǵa ákep soqqan bilik pen laýazymdyq ókilettikterdi ózine jáne basqalarǵa paida men artyqshylyqtar alý maqsatynda asyra paidalaný (QK 362-baby 4-bóliginiń 3-tarmaǵy) týraly baptar boiynsha sotqa berildi.
D.E. Erǵojin (UQK tóraǵasynyń burynǵy orynbasary) bilikti kúshpen basyp alǵany (QK 179-babynyń 3-bóligi), aýyr zardaptarǵa ákep soqtyrǵan bilik pen laýazymdyq ókilettikterdi ózine jáne basqalarǵa paida men artyqshylyqtar alý maqsatynda asyra paidalanǵany úshin aiyptalyp jatyr (QK 362-baby 4-bóliginiń 3-tarmaǵy).
M.S. Osipovke (UQK tóraǵasynyń burynǵy orynbasary), D.M. Akipovqa (UQK departament bastyǵynyń burynǵy orynbasary) jáne N.K. Bekmýratqa (UQK-nyń burynǵy basqarma bastyǵy) Qylmystyq kodekstiń 362-babynyń ártúrli bólikteri boiynsha aiyp taǵyldy" - delingen vedomstvo habarlamasynda.
Qylmystyq is «óte qupiia» belgisimen tergelgen jáne sotpen de osy tártipte qaralady.
