Bul týraly «Nur Otan» partiiasy Tóraǵasynyń Birinshi orynbasary Máýlen Áshimbaev bilim berýde erekshe jaǵdaidy talap etetin balalarǵa arnalǵan «VI-Juldyzai» respýblikalyq spartakiadasynyń ashylý saltanatynda aitty.
Saltanatty rásimde barsha qatysýshylardy spartakiadanyń ashylýymen quttyqtaǵan «Nur Otan» partiiasy Tóraǵasynyń Birinshi orynbasary jas sportshylarǵa sáttilik tiledi.
– Búgingi saiysty batyldyq pen tózimdiliktiń, qairat pen qajyrlyqtyń jáne namys pen asqaq rýhtyń jarqyn kórinisi deýge ábden bolady. Sondyqtan spartakiadanyń ár qatysýshysy qandai nátije kórsetse de jeńimpaz dep tanylatyny sózsiz. Óitkeni osyndai iri jarysqa kelip, qatysýdyń ózi, shyn máninde, úlken jetistik, – dedi Máýlen Áshimbaev.
Sonymen qatar ol bul baǵytta elimizde jasalyp jatqan jumystarǵa nazar aýdaryp:
– Kez kelgen eldiń damýyn anyqtaityn túrli kórsetkishter bolady. Solardyń biri jáne eń mańyzdysy – múmkindigi shekteýli jandardyń ómir sapasy. Eger mundai jandardyń quqyǵy qorǵalyp, barlyq qajetti jaǵdai jasalsa, ondai memleketti jan-jaqty damyǵan dep aitýǵa tolyq negiz bar. Osy turǵydan kelgende, Qazaqstanda Elbasymyzdyń tikelei tapsyrmasymen júieli jumystar júrgizilip jatqanyn atap ótken jón. Iaǵni, elimizde inkliýzivti bilim berý júiesin engizý, kedergisiz orta qalyptastyrý, múmkindigi shekteýli jandardyń jumysqa ornalasýyna qoldaý kórsetý jáne osy salaǵa qatysty zańnamalardy odan ári jetildirý jumystary qarqyndy júrgizilip jatyr, – dedi.
Sondai-aq Máýlen Áshimbaev «Nur Otan» partiiasy da osy baǵyttaǵy «Kedergisiz keleshek» partiialyq jobasy aiasynda aýqymdy jumystar atqaryp jatqanyna nazar aýdardy.
Spartakiada 2016 jyldan beri «VI-Juldyzai» korporativti qorynyń bastamasymen «Nur Otan» partiiasynyń, Bilim jáne ǵylym ministrliginiń, Mádeniet jáne sport ministrliginiń, Nazarbaev ýniversitetiniń, sport federatsiialarynyń, Paralimpiadalyq komitettiń jáne Astana qalasy ákimdiginiń qoldaýymen ótkizilip keledi. Biyl atalǵan saiys Astananyń 20 jyldyǵy aiasynda uiymdastyrylyp otyr.
