Májilistiń jalpy otyrysynda Sybailas jemqorlyqqa qarsy is-qimyl agenttiginiń tóraǵasy Marat Ahmetjanov shetelge zańsyz ketken qarajatty qaitarý rásimine qatysty túsinik berdi, dep habarlaidy QazAqparat.
«Qazaqstan Respýblikasynyń keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasyn birinshi oqylymda talqylaý kezinde depýtat Erlan Sairov zańsyz ketken kapitaldy elge qaitarý qadamdary jaiynda suraq qoidy.
«Prezident zańsyz ketken kapitaldy shetelden Qazaqstanǵa qaitarý jóninde naqty tapsyrma berdi. Osy oraida halqymyz naqty ári qarqyndy nátijeni kútip otyr. Birinshiden, atalǵan zańda qandai naqty tetikter bar? Ekinshiden, sheteldegi qandai quzyrly organdarmen jumys júrgizilip jatyr Zańsyz ketken kapitaldy Qazaqstanǵa qaitarý protsesi qansha ýaqytqa sozylýy múmkin?», - dep surady E. Sairov.
Óz kezeginde QR Sybailas jemqorlyqqa qarsy is-qimyl agenttiginiń tóraǵasy Marat Ahmetjanov bul máselede qylmystyq is qozǵalýy kerek ekenin jetkizdi.
«Oǵan (sheteldik quzyrly organdarǵa) quqyqtyq kómek berý úshin tapsyrys jiberýimiz kerek. Eki jaqpen, iaǵni sol elmen quqyqtyq kelisim bolýy kerek. Biz sanktsiialap, tiisti suranys jiberemiz. Bul turǵyda sheteldegi quqyq qorǵaý organdary múlikti (zańsyz shyǵarylǵan) zerdeleidi. Osy oraida bizdiń suranys boiynsha sanktsiialap, shekteý qoiylýy tiis. Budan keiin sottalǵan kezde, búkil dálelderin bergen kezde, zańsyz ári qylmys jolymen alynǵany naqtylaǵanda, olar bizge qylmystyq protsespen tolyq qaitarýǵa múmkindigi bolady», - dep túsindirdi agenttik basshysy.
Onyń aitýynsha, zańsyz ketken kapitaldy Qazaqstanǵa qaitarý protsesi boiynsha Bas prokýratýranyń bastamasymen tiisti toptar quryldy. Onyń ókiletti organy – Qarjylyq monitring agenttigi, Bas prokýratýra jáne Sybailas jemqorlyqqa qarsy is-qimyl agenttigi. Sol jumys aiasynda zańǵa sáikes tásilder eskerilgen.
Sonymen qatar ol búgin talqylanǵan zań jobasy aiasyndaǵa negizsiz baiýǵa tosqaýyl qoiý qadamdaryna toqtaldy.
«Negizsiz baiýǵa qatysty toqtalsaq, zań qabyldanǵan kezde, adam qarajattyń qaidan kelgenin túsindire almasa, zańǵa silteme jasap aktivterdi qaitarýǵa múmkindigimiz bar», - dedi M. Ahmetjanov.
