Dúniejúzilik karantin talaptary tyń mádeni izdenisterge negiz bolyp, jańa mazmun men formadaǵy óner týyndylarynyń týýyna sebepker boldy. Aqyn, mýzykant Maqpalsher-diń (Maqpal Jumabai) «Qolyńdy ber» albomy da - osy baǵyttaǵy eksperimenttik joba, dep habarlaidy QazAqparat.
«Qolyńdy ber» bir mezgilde álemniń eki núktesinde – Qazaqstan men Germaniia mýzykanttarynyń qatysýymen Live rejimde jazyldy.
Albomnyń basym bóligi Berlindegi Jazzanova Recording Studio (JRS) stýdiiasynda uiymdastyryldy.
Al, túsirilim jumystary Berlin jáne Almaty qalalarynda taspalanǵan.
JRS – 2013 jyly negizi qalanǵan Eýropadaǵy ozyq dybys jazý stýdiialarynyń biri. Dybys injeneri ári stýdiiany qurýshy Axel Reinemer.
Aita keterligi, bul stýdiiada Reinemerdiń jetekshiligimen Black Eyed Peas, Rihanna, Patricia Kaas syndy álemge tanymal mýzykanttar men Universal Music, Sony Music stýdiialary dybys jazǵan.
Dál osy stýdiiada jazylǵan LP5 mýzykalyq albomy 2020 jyly Grammy nominanty atandy.
«Qolyńdy ber» atty minialbomnyń negizgi taqyryby – adamzat jáne onyń kókeikesti suraqtary. Joba pandemiia kezeńindegi adamnyń kóńil- kúii men jan bulqynysyn sipattaidy. Albomnyń aty aityp turǵandai, bir-birimizge bir sát nazar aýdaryp, júrek kózimen qaraýǵa, qajet bolsa qol sozyp, birlesýge shaqyrady. Sonymen qatar, bul halyqaralyq joba ónerdiń álemge ortaq qundylyq ekenin dáriptep, til, dil jáne mádeni alýandylyqtyń ónerdi baiyta túsetinin dáleldeidi. Osy oraida jobaǵa qatysqan germaniialyq mýzykanttar: «Áý basta biz mádeni shekarany attap ótip, jobaǵa óz deńgeiinde úles qosa alamyz ba?» dep ýaiymdaǵan edik. Alaida, ýaiymymyz is júzinde negizsiz bolyp shyqty. Kompozitsiialardy oryndai bastaǵanda-aq barlyq qorqynyshymyz seiildi. Bul – mýzykanyń, ónerdiń kúshi edi! «Qolyńdy ber» – biz úshin mýzykanyń múmkindigin jáne bir tanytqan ǵajap tájiribe boldy», - dep pikir bildirdi Alex Reinemer.
Eske sala keteiik, «Qolyńdy ber» – Maqpalsher-diń ekinshi halyqaralyq mýzykalyq jobasy.
2019 jyly aqyn, kompozitor Londondaǵy The Brunel Museum sahnasynda «AUA» kontseptýaldy kontsertin ótkizgen bolatyn.
Belgili britan aqyny Devid Kýk aldyn ala aǵylshyn tiline aýdarǵan sol keshte oryndalǵan barlyq jyr kórermenge jinaq túrinde tartý etilgen.
«Qolyńdy ber» albomynyń videosy YouTube platformasynda 9 qyrkúiek kúni jaryq kórdi.
Sonymen qatar jaqyn arada albomdy Itunes, Apple Music, Yandex Music, Spotify jáne basqa striming platformalarynda tyńdaýǵa, júkteýge bolady.
