Qazaqstannyń halyq ártisi Maqpal Júnisova Aqtóbedegi jeke kontsertinde 90 jasqa tolǵan tyńdarmanyna 100 myń teńge syilady. Ánshiniń bul áreketi kórermenderdi tánti etti, dep habarlaidy ult.kz.

Kontsert barysynda tyńdarmandardyń biri sahnaǵa jaqyndap, 90 jasqa tolǵan anasyn ánshiniń kontsertine arnaiy ertip kelgenin aitqan. Muny estigen Maqpal Júnisova qariiany týǵan kúnimen quttyqtap, oǵan 100 myń teńge aqshalai syilyq tartý etti.

Ánshiniń bul sátin zalda otyrǵan kórermenderdiń biri videoǵa túsirip alǵan. Keiin beinejazba áleýmettik jelide tarady.

Jeli qoldanýshylary óner iesiniń jomarttyǵyna tánti bolyp, jyly pikirlerin qaldyrdy.

«Jomart dese, jomart qoi. Maqpal apai, aman bolyńyz!», «Peiili keń adam ǵoi», «Bul kisi osyndai jomarttyǵymen erekshe», «Ne degen jomarttyq, aman bolyńyz», – dep jazdy olar.

Aita keteiik, tanymal ánshi Maqpal Júnisova úiine jóndeý jumystaryn júrgizgen qurylysshylarǵa narazylyǵyn bildirdi. Óner iesiniń aitýynsha, úige jóndeý jasalǵanyna áli bir jyl tolmaǵanymen, qabyrǵalary túsip, qurylys sapasyna qatysty másele týyndaǵan.

Maqpal Júnisova kim?

Maqpal Júnisova – qazaq estradasynyń belgili ánshisi, Qazaqstannyń halyq ártisi jáne Memlekettik syilyqtyń laýreaty. Ol 1964 jyly 11 qańtarda Qaraǵandy oblysy, Qarqaraly aýdany, Terekti aýylynda dúniege kelgen.

Óner iesi A. Jubanov atyndaǵy qazaq mýzykalyq mektep-internatynda qobyz synybynda bilim alǵan. Keiin ál-Farabi atyndaǵy Qazaq memlekettik ýniversitetin támamdaǵan.

Maqpal Júnisova shyǵarmashylyq jolyn «Gúlder» ansamblinde halyq ánderin oryndaýdan bastaǵan. Keiin «Qazaqkontsert» janynan «Nazerke» ansamblin uiymdastyrǵan. Onyń repertýarynda halyq ánderimen qatar qazaq kompozitorlarynyń shyǵarmalary bar.

Ánshiniń oryndaýyndaǵy «Ǵashyq júrek», «Qyz ǵumyr», «Fariza qyz», «Qoshtasý» sekildi ánder kópshilikke keńinen tanymal.

Maqpal Júnisova – marqum saiasatker Zamanbek Nurqadilovtiń jary bolǵan.

2026 jyly ánshi 62 jasqa toldy. Qazir de shyǵarmashylyqpen ainalysyp, jeke kontsertterin ótkizip júr.