Qyzylorda oblysynyń politsiia departamenti áleýmettik jeliler men messendjerlerde keń taraǵan «óńirde seriialyq maniak júr» degen qaýesetti resmi túrde joqqa shyǵardy, dep habarlaidy ult.kz Politico.kz saityna silteme jasap.
Vedomstvonyń málimetinshe, sońǵy kúnderi turǵyndar arasynda úrei týyndaýyna bir-birimen bailanysy joq eki bólek qaiǵyly oqiǵa sebep bolǵan. Alaida quqyq qorǵaý organdary bul oqiǵalardyń arasynda eshqandai ortaq qylmystyq bailanys joq ekenin naqty aitty.
Birinshi oqiǵa 1 maýsym kúni Jańaqorǵan aýdanynda jergilikti turǵynnyń ólimi tirkeldi. Jedel-izdestirý sharalarynyń nátijesinde kúdikti anyqtalyp, ustaldy. Sot sanktsiiasymen ol qamaýǵa alyndy. Qazirgi tańda tergeý amaldary júrgizilýde.
Ekinshi oqiǵa 3 maýsym kúni Shieli aýdanynda kanal shliýzinen buǵan deiin joǵalyp ketken qyzdyń denesi tabyldy. Atalǵan fakt boiynsha qylmystyq is qozǵalyp, oqiǵanyń mán-jaiy tolyq tekserilip jatyr.
Politsiia bul ister boiynsha tergeý múddesine bailanysty barlyq derekter jariialanbaitynyn atap ótti.
Sonymen qatar vedomstvo áleýmettik jelilerde rastalmaǵan aqparat pen túrli qaýesetterdiń taralýy qoǵamda negizsiz úrei týdyratynyn eskertip, azamattardy tek resmi derekkózderge senýge shaqyrdy. Jalǵan aqparat taratqandar zań aiasynda jaýapkershilikke tartylatyny da qatań eskertildi.
