Foto: Tengrinews.kz
Kólik júrgizýshileri 4 paiyzdyq nesieniń sharttaryna shaǵymdandy. Qazaqstandyqtar avtosalondar men bankter usynatyn qosymsha talaptar týraly aityp jatyr. Olardyń aitýynsha, mundai sharttar jeńildikpen avtonesie berýdiń mánin joǵaltady, - dep habarlaidy Tengrinews.kz tilshisi.
Almatylyq Marat Asylbekov (aty-jóni keiipkerdiń ótinishi boiynsha ózgertilgen) jarty jylǵa jýyq kólik izdegen. Jyldyń basynda sheneýnikter jeńildetilgen avtonesieni qaita bastaǵanyn málimdegennen keiin, er adam múmkindikti paidalanbaq bolypty. Alaida ol baǵdarlamanyń bastalýyn kútip, sáýirdiń sońynda qalanyń keibir avtosalonyna barǵan. Sol kezde Asylbekov "baǵdarlamanyń "ertegidei" sharttaryn buzbaý úshin sheneýnikter aitpaityn" qyzyq málimetter tapqan.
"Eń aldymen avtosalonda prais-list alasyń, onda olar mór qoiyp, kelgen kúnińdi jazady. Osy qaǵazben bank menedjerine baryp, ótinish beresiz, keiin sheshimdi kútesiz. Ótinishte kórsetilgen mashina avtosalonda bolýy kerek. Biraq mundai avtomobilderde qosymsha jabdyq ornatylǵan, ony alyp tastaýǵa jáne bul jabdyqsyz satýǵa bolmaidy. Olardyń quny 700 myńnan bastalyp, shamamen eki million teńgege jetedi.
Qosymsha jabdyqtar salynbaǵan kólikter joq nemese avtokólik dilerleri osy aksessýarlardan aqsha tabý úshin joq dep ádeii aitady. Osylai aldamaq. Iaǵni, satyp alýshy oilamaǵan shyǵyndar shyǵa keledi", - dedi Asylbekov.
Onyń aitýynsha, 4 paiyzdyq avtonesie qatysýshylaryn taǵy bir jaǵymsyz tosynsyi kútip tur. Almaty turǵyny bankten avtonesie alý úshin nesieniń barlyq merzimine KASKO saqtandyrýyn tóleýi keregin aitty. Al erikti-mindetti saqtandyrýdyń bul túri jylyna keminde 200 myń teńge turady.
"Eger jeti jylǵa nesie alsań, onda KASKO-ny búkil kezeńge tóleý kerek. Al bul 1,4 million teńgeden asady. Iaǵni, jeńildikpen avtonesie berýdiń maǵynasy joǵalady. Óitkeni, mysaly, adam avtokólikti bastapqy jarnasyz 10 million teńgege alady. Jyldyq tórt paiyzben artyq tólemi jeti jylǵa shamamen 1,5 million teńge bolady. Bul somaǵa qosymsha optsiialarǵa ketetin shamamen eki million teńge jáne KASKO úshin kem degende 1,4 million teńge qosamyz.
Nátijesinde, 10 million teńge turatyn jańa kóliktiń artyq tólemi shamamen bes million teńge bolady. Al bul jylyna tórt paiyz emes, 12 paiyzǵa deiin jetedi. Munyń qai jeri jeńildetilgen nesie ekeni túsiniksiz", - dep qosty ol.
Taǵy bir almatylyq turǵyn Viacheslav Ilin biyl aqpanda óz aqshasyna avtokólik satyp alǵan. Ol eski kólikti jańasyna aýystyryp, Trade-in baǵdarlamasyna júgingen. Burynǵy kóligin avtosalonǵa berip, jańa kólik úshin 10 million 300 myń teńge bergen. Alaida jańa avtokólikke ornatylǵan qosymsha jabdyq úshin taǵy 300 myń teńge tóleýine týra kelipti.
Al avtokólik sarapshysy Aleksei Alekseev avtosalondar qosymsha optsiialary joq kólikterdi satpaýǵa quqyǵy baryn aitty.
"Avtokólik - taýar, onyń satý sharttaryn belgileitin satýshysy bar. Al satyp alýshy bul sharttarmen kelise me, álde basqa taýar men basqa satýshy izdei me, ózi biledi. Sondyqtan qosymsha jabdyqtarmen satyp alýǵa májbúrleý zańdy ma, joq pa? Meniń oiymsha, satýshynyń kózqarasy zańdy.
Biraq kez kelgen jaǵdaida satyp alýshy kólikti qosymsha optsiiasyz satýdy talap etýge quqyly. Kóbine kólikti kútýge týra keledi, keide alty aiǵa deiin. Eger satyp alýshy mundai sharttarǵa daiyn bolsa, onda ol kólikti sol kezdegi prais-list baǵasy boiynsha alady", - dedi ol.
Tutynýshylardyń quqyǵyn qorǵaý komiteti avtokólik dileri qosymsha jabdyǵy bar kólikti satýǵa tyrysqan jaǵdaida ne isteý keregin túsindirdi.
"Eger avtosalonnyń resmi saitynda prais-listte nemese broshiýralarda sharttyń barlyq talaby, onyń ishinde avtomobildiń resmi quny kórsetilse, onda tutynýshy ony sipattamada kórsetilgen jiyntyq pen baǵaǵa satyp alýǵa quqyly. Taýardy úlgi nemese sipattama boiynsha satqan kezde tutynýshy úlgige nemese sipattamaǵa sáikes keletin osy ónimdi alýǵa quqyly. Satýshy tutynýshyǵa osyndai taýardy berýge mindetti.
Qosymsha aqy tólenetin taýarlar tutynýshylardyń quqyǵyn buzatyn sharttarǵa jatady. Belgili bir taýarlardy satyp alý kezinde basqa taýarlardy mindetti túrde satyp alý shartyn qoiýǵa zańmen tyiym salynady", - dedi vedomstvo ókilderi.
4 paiyzdyq avtonesieleý baǵdarlamasy 16 mamyrda bastalǵan. Onyń sharty boiynsha kez kelgen qazaqstandyq avtomobildi nesiege 4 paiyzben satyp ala alady. Avtokredit 10 million teńgeden aspaityn somaǵa jáne 7 jylǵa deiingi merzimge beriledi. Bastapqy jarna 0 paiyzdan bastalady, kólik quralynyń jalpy quny 15 million teńgeden aspaýy tiis. Bul joly jeńildetilgen avtonesieleý baǵdarlamasynyń sharttaryna Hyundai, KIA, Chevrolet, LADA, JAC jáne Renault kompaniialarynyń keibir modeli kiredi.
Avtokredit alý úshin myna ekinshi deńgeili bankterge júginýge bolady: "Eýraziialyq bank" AQ, "Bank TsentrKredit" AQ, "Qazaqstan Halyq banki" AQ, Forte Bank AQ.
