Qazaqstannyń bilim jáne ekologiia salalarynyń úzdigi Orynbasar Toqjanov Bozjyrada týristik keshen salýǵa qatysty pikirin bildirdi, dep habarlaidy QazAqparat.
Mańǵystaý ólkesi – Qazaqstandaǵy týrizmdi damytýǵa qolaily aimaq ekendigi barshamyzǵa belgili. Biyl óńirimizde bes juldyzdy Rixos qonaqúii ashylyp, ólkemizge jan-jaqtan keletin týrister sany artty. Sondai-aq, saiahattaýshylar tabiǵi jerlerdi de aralap, kelýshilerdiń kóp bóligi Bozjyra shatqalyna qyzyǵýshylyq tanytty. Ózderińizge belgili, sheteldik investorlar tarapynan atalǵan Bozjyra shatqaly aýmaǵynda jańa týrizm nysanyn salýǵa usynys túsip, qazirgi tańǵa deiin qoǵam tarapynan qyzý talqylanýda. Osy rette Bozjyra kesheniniń salynýyna óz kózqarasymdy bildire ketsem, ólkemizdiń qundy jádigerlerin qorǵai otyryp, tarihi-mádeni oryndarymyzdy saqtai bilýimiz kerek. Mádeni oryndarymyzdyń kelýshiler áserinen qoqysqa tolyp, qunyn joǵaltpaýyn qadaǵalaýymyz kerek. Mádeni oryndarymyzdyń «jabaiy» týristik orynǵa ainalmaýy, biz úshin eskeriliýi tiis dúnie dep esepteimin. Sol sebepti men Bozjyra aýmaǵynyń florasy men faýnasyna ziian keltirmeitin joba arqyly, ólkemizdiń damýyna áser etetin taǵy da bir sátti joba bolady dep oilaimyn. Birinshiden, óńir týrizmin damytý arqyly ekonomikamyzdy órkendetemiz. Shaǵyn jáne orta biznestiń damýyna, jergilikti azamattarymyzdyń jumyspen qamtylýyna mol múmkindik týyndar edi. Jáne de qonaq úi qurylysy bastalǵan jaǵdaida, aýmaq mańyndaǵy turǵyndardy da jumyspen qamti alamyz.
Ekinshiden, týristik keshendi salý arqyly Bozjyraǵa óz betinshe beibereket baryp, tabiǵatqa orasan ziian keltiretin týristerge tosqaýyl bola alamyz.
Úshinshiden, atalǵan jobanyń halyqtyń qaýqary az toptary úshin qoljetimdiliktiń barlyq talaptary men standarttaryna sáikes oryndalatyny qýantady.
Tórtinshiden, Bozjyraǵa baratyn jol salý arqyly, aýmaq mańynda ornalasqan eldi mekenderdiń de jaǵdaiy qalypty bolar edi. Osy rette joǵaryda atalǵan máselelerdi negizge ala otyryp, mamandarmen tyńǵylyqty talqylanǵan, saraptalǵan, naqtylanǵan jobanyń iske asyrylýyn durys dep eseptep, birneshe ziialy qaýym ókilderi atynan Prezident Q.K.Toqaevqa 2020 jyldyń 25 jeltoqsan kúni Úndeý hatyn joldaǵan bolatynbyz.
Bozjyra týristik keshenin salý – ol tabiǵatty qorǵaý, qundylyqtarymyzdy qasterleý, jergilikti tarihi-tabiǵi oryndardyń sakraldylyǵyn saqtaý, jergilikti dil, tanym-ǵuryptyq qundylyqtarymyzdy eskere otyryp, órkenietti jolmen týrizm mádenietiniń qalyptasýy. Bozjyra týristik nysanyn salý óńirimizdiń áleýmettik-ekonomikalyq damýyn, týristik áleýetiniń artýyn, qorshaǵan ortany qorǵaý maqsatyna baǵyttalǵan qundy joba dep oilaimyn.
