QR Básekelestikti qorǵaý jáne damytý agenttiginiń Otyn-energetika ónerkásibi departamenti basqarmasynyń basshysy Qýat Asambekov Mańǵystaý oblysyndaǵy jaǵdaiǵa bailanysty «karteldik kelisim» boiynsha tergeý bastalǵanyn aitty, dep habarlaidy QazAqparat agenttigi.
Ortalyq kommýnikatsiialar qyzmetinde ótken brifingide QR Básekelestikti qorǵaý jáne damytý agenttiginiń Otyn-energetika ónerkásibi departamenti basqarmasynyń basshysy Qýat Asambekov suiytylǵan gaz baǵasynyń naryǵynda qalyptasqan jaǵdaiǵa bailanysty birneshe oblysta tergeý bastalǵanyn málim etti.
«Agenttik óz tarapynan osy jaǵdai boiynsha taldaý jasady. Qazirgi tańda Mańǵystaý oblysynda baǵany kelsý boiynsha, karteldik kelisim boiynsha tergeý bastaldy. Taǵy da basqa Qostanai men Soltústik Qazaqstan oblystary boiynsha tergeýler júrgizilip jatyr. Tergeý jaqynda bastalǵanyna bailanysty qazir qorytyndy týraly aitý erte. Birshama ýaqyt kerek bolady», - dedi agenttik ókili.
Eske salsaq, Memleket basshysy Qasym-Jomart Toqaev Twitter-degi suiytylǵan gaz baǵasynan bastalǵan paraqshasynda Jańaózendegi jaǵdaiǵa qatysty jazba jariialaǵan bolatyn.
«Úkimetke Jańaózendegi jaǵdaidy ekonomikalyq turǵydan eskerip, quqyqtyq jaǵynan tez arada qarastyrýdy tapsyrdym. Sherýge shyqqandar qoǵamdyq tártipti buzbaýy tiis. Azamattardyń jergilikti jáne ortalyq bilik organdaryna talabyn ashyq aitýǵa quqyǵy bar, biraq, bul zańǵa, naqtyraq aitqanda, beibit sherýler týraly zańǵa sáikes júzege asyrylýy kerek», delingen jazbada.
Al QR Premer-Ministriniń resmi saity Mańǵystaý oblysyndaǵy janarmai stansalarynyń ieleri suiytylǵan munai gazynyń qunyn litrine 120 teńgeden 85-90 teńgege deiin tómendetý týraly sheshim qabyldaǵanyn jazdy.
