Mańǵystaý oblysynda jańa gaz óńdeý zaýyty salynady. Bul týraly QR Energetika ministri Bolat Aqsholaqov aitty, dep habarlaidy QazAqparat.
«Memleket basshysynyń tapsyrmasyna sáikes osy jylǵy 5 qańtardan bastap eldegi áleýmettik-ekonomikalyq jaǵdaidy turaqtandyrý úshin suiytylǵan gaz naryǵy boiynsha mynadai shuǵyl is-sharalar qabyldandy. Óńirdiń qashyqtyǵyna bailanysty suiytylǵan munai gazynyń bólshek saýda baǵasy litrine 50-den 75 teńgege deiingi dálizde belgilendi. Suiytylǵan munai gazynyń shekti kóterme baǵasy 38,7-den 28 myń teńgege deiin tómendetildi. 2023 jylǵy 1 qańtarǵa deiin Saýda-sattyq qaǵidalary toqtatyla turady. Oǵan sáikes Energetika ministrligi suiytylǵan gazdy elektrondyq saýda-sattyqtan tys satatyn bolady. Ónimdi berý josparyn qalyptastyrý qaǵidalaryna túzetýler engizý jónindegi buiryq bekitildi. Oǵan sáikes respýblika aýmaǵynda kóterme jáne bólshek saýdada ótkizý quqyǵy bar sýbektilerdiń tizbesi keńeitildi», - dedi ol ministrliktiń keńeitilgen alqa otyrysynda.
Sonymen qatar ol suiytylǵan munai gaz naryǵyndaǵy jaǵdaidy turaqtandyrý jónindegi qosymsha is-sharalardy da atady
«Qosymsha is-sharalar retinde, onyń ishinde uzaq merzimdi baǵa turaqtylyǵyn qamtamasyz ete otyryp, baǵalardyń alypsatarlyq aýytqýyna jol bermei úshin mynadai is-sharalar pysyqtalýda. Birinshiden - óndirýshi zaýyttardyń suiytylǵan gazǵa shekti kóterme baǵalardy belgilengen bólshek saýda baǵalaryna súiene otyryp anyqtaý ádistemesin ázirleý. Bul túsimdi zaýyttar men satýshylar arasynda ádil bólýge múmkindik beredi. Ekinshiden, jumys istep turǵan Qazaq gaz óńdeý zaýytynyń ornyna Mańǵystaý oblysynda jańa gaz óńdeý zaýytyn jobalaýǵa jáne salýǵa EPC-kelisimshart jasasý josparlanýda. Jobanyń aldyn ala quny 167,7 mlrd teńgeni quraidy», - dedi Bolat Aqsholaqov.
