Mańǵystaýda kishkentai bozdaq (itbalyqtyń balasy) qutqaryldy. Bul týraly Aqtaý qalasyndaǵy Kaspii itbalyǵyn zertteý jáne ońaltý ortalyǵy habarlady.
Bozdaq (itbalyqtyń balasy) Aqtaý qalasyndaǵy Kaspii itbalyǵyn zertteý jáne ońaltý ortalyǵynda eki aptadai bolǵan. Ortalyqqa túsken kezde álsiz, salmaǵy 4,4 keli ǵana bolsa, qazir 7 kelige deiin jetti. Óz kúshimen júzip, balyq ustai bastady.
Ortalyq qyzmetkerleri bozdaqtyń damýy jaqsy jáne ilgerileý baiqalatynyn aitty.
«Bozdaqtyń tábeti jaqsy, óte epti, sonymen qatar óz kúshimen taǵam jei bastady. Ektoparazitterden tazartý protsedýrasyn ótkizdik», - delingen habarlamada.
Aita keteiik, Aqtaýdaǵy Kaspii itbalyǵyn zertteý jáne ońaltý ortalyǵyna 29 naýryzda saǵat 10.00-de jergilikti turǵyndardan Baýtino kentinde teńiz jaǵasynda itbalyqty tapqany týraly qońyraý túsken. Kýágerlerdiń aitýynsha, itbalyq jaǵada eki kúndei jatyp qalǵan.
Ortalyq mamandary itbalyq tabylǵan jerge baryp, oǵan alǵashqy veterinariialyq kómek kórsetken. Alǵashynda itbalyqtyń jaǵdaiy qiyn jáne qozǵalyssyz jatqan. Sol kúni ony ortalyqqa jetkizgen. Mamandardyń aitýynsha, bozdaqtyń jasy-bir ai, dene salmaǵy-4,4 keli. Ol bul jasta 10-12 keli tartýy kerek.
