Mańǵystaýda sýǵa ketip kóz jumǵan áskerlerdiń videosy tarady, dep habarlaidy ult.kz.
Videoda «Úige qaitýǵa 1-2 apta ǵana qaldy» dep jazylǵan.
«29011 VMS DShB sarbazdary Otan aldyndaǵy boryshtaryn abyroimen ótep, endi týǵan jeri men otbasyna oralatyn kúndi kútýde. Ár sarbazdyń artynda asyǵa kútip otyrǵan ata-anasy, baýyrlary bar. Sol sebepti eń basty tilegimiz – amandyq, abyroily qyzmet jáne elge aman-esen oralý!», - delingen videoda.
Aita keteiik, Kaspii teńizine 19 áskeri qyzmetshi barǵan. Qazirgi ýaqytta olardyń on ekisi qaza tapqany belgili boldy. Úsh áskeri qyzmetshi qutqarylǵan. Olardyń bireýi aýrýhanaǵa jatqyzyldy. Qalǵan áskeri qyzmetshilerdi izdestirý jumystary jalǵasyp jatyr.
Oqiǵa ornyna qutqarý qyzmetteriniń kúshteri men quraldary dereý jiberilgen. Izdestirý-qutqarý jumystaryna Áskeri-teńiz kúshteri men Tótenshe jaǵdailar ministrliginiń bólimsheleri, aviatsiia jáne basqa da tiisti qyzmetter jumyldyryldy.
Oqiǵanyń sebepterin anyqtaý úshin Úkimettik komissiia quryldy. Qazaqstan Respýblikasy Premer-ministriniń ókimimen qurylǵan komissiiaǵa Premer-ministrdiń orynbasary Qanat Bozymbaev jetekshilik etedi.
Komissiia quramyna Qorǵanys ministri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdailar, Densaýlyq saqtaý jáne Kólik ministrlikteriniń basshylyǵy, Bas áskeri prokýror jáne Shekara qyzmetiniń ókilderi kirdi.
Premer-ministr Oljas Bektenov komissiia tóraǵasy Qanat Bozymbaevqa oqiǵa ornyna shuǵyl baryp, áskeri qyzmetshilerdiń qaza bolý sebepterin anyqtaýdy tapsyrdy.
Sonymen qatar komissiiaǵa qaza tapqan áskeri qyzmetshilerdiń otbasylaryna qajetti kómek kórsetý tapsyryldy.
Keiin qaza tapqan áskeri qyzmetshilerdiń aty-jóni jariialandy. Memleket basshysy Qasym-Jomart Toqaev qaza bolǵandardyń otbasylaryna kóńil aitty.
