Mańǵystaý oblysynda investorlar men kásipkerlerdiń quqyqtaryn buzǵan laýazymdy tulǵalar ákimshilik jaýapkershilikke tartylyp, olarǵa jalpy somasy 9,1 mln teńge aiyppul salyndy, dep habarlaidy ult.kz.
Túpqaraǵan aýdanynyń prokýratýrasy Investorlardyń quqyqtaryn qorǵaý komitetimen birlesip júrgizgen tekserý barysynda kásipkerlerdi injenerlik jelilerge qosý kezinde zań talaptarynyń buzylǵany anyqtaldy.
Tekserý nátijesinde 3 investor men 16 kásipkerdiń quqyǵy qorǵaldy. Belgili bolǵandai, tabiǵi monopoliia sýbektileri elektr jáne sýmen jabdyqtaý jelilerine qosylýǵa tehnikalyq shart berý kezinde zańnamada kózdelmegen qujattardy talap etken.
Sonymen qatar, tehnikalyq shart berýden bas tartý týraly ýákiletti organdarǵa der kezinde habarlamaý jáne investorlar men kásipkerlerdiń ótinishterin qaraý merzimderin buzý faktileri tirkeldi.
Prokýrorlyq qadaǵalaý aktileri negizinde eki tabiǵi monopoliia sýbektisine qatysty ákimshilik quqyq buzýshylyq boiynsha 16 is qozǵaldy. Nátijesinde kináli laýazymdy tulǵalar jaýapqa tartylyp, taǵaiyndalǵan aiyppul tolyq kólemde óndirildi.
Prokýratýra qabyldanǵan sharalar kásipkerlerge qoiylǵan ákimshilik kedergilerdi joiýǵa, investorlardyń buzylǵan quqyqtaryn qalpyna keltirýge jáne injenerlik jelilerge qosý kezinde zań talaptarynyń saqtalýyn qamtamasyz etýge yqpal etkenin málimdedi.
