Mańǵystaý oblysynda Jańaózen qalalyq kópbeiindi aýrýhanasyna kúiik bólimshesin ashýǵa bólingen 223 mln teńge demeýshilik qarajatty jymqyrý deregi boiynsha qylmystyq is tergelip jatyr, dep habarlaidy ult.kz.
Qarjylyq monitoring agenttiginiń málimetinshe, iske aýrýhana direktorynyń orynbasary, «Jarylqaý» qoǵamdyq qorynyń basshysy, Jańaózen qalasy ákiminiń burynǵy orynbasary jáne ónim berýshi kompaniia ókili qatysy bar dep kúdikke ilingen. Qazirgi tańda úsh kúdikti qamaýǵa alynǵan.
2025 jyly «QazMunaiGaz» UK» AQ demeýshilik retinde bólgen 223 mln teńge «ÓzenMunaiGaz» AQ arqyly «Jarylqaý» qoryna aýdarylǵan. Bastapqyda bul qarajatqa segiz túrli meditsinalyq jabdyq satyp alý josparlanǵan. Alaida keiin kelisimshart ózgertilip, 210 mln teńgege nebári eki arnaiy kereýet satyp alý týraly shart jasalǵan.
Tergeý nusqasy boiynsha, satyp alý Biryńǵai distribiýtordy ainalyp ótip, zań talaptaryn buza otyryp júrgizilgen. Jabdyqqa is júzinde 92 mln teńge jumsalyp, qalǵan qarajat úlestes kásiporyndar arqyly qolma-qol aqshaǵa ainaldyrylǵan.
Tergeý málimetine sáikes, «AKBS Invest» JShS ókili qylmystyq jolmen alynǵan aqshaǵa Astanadan páter satyp alyp, ony úshinshi tulǵalardyń atyna rásimdegen.
Sot sanktsiiasymen kúdiktilerdiń múlkine, onyń ishinde úsh páterge, eki turǵyn úige jáne avtokólikke tyiym salyndy.
Sonymen qatar Jańaózen qalasy ákiminiń burynǵy orynbasaryna qatysty Qylmystyq kodekstiń 361-baby boiynsha laýazymdyq ókilettikterin teris paidalaný deregimen tergeý bastaldy.
Qylmystyq-protsestik kodekstiń 201-babyna sáikes, tergeý múddesine bailanysty ózge aqparat jariia etilmeidi.
