Mańǵystaýda arqar atqan brakoner – politseiler jumystan qýyldy.
Zańdy belshesinen basqandardyń jumystan shyǵarylǵandyǵy týraly Mańǵystaý oblysynyń Politsiia departamentiniń basshysy Janarbek Baqtybaev málim etti, dep habarlaidy QazAqparat tilshisi.
Álemjelide jeldei esken kadrlar kóptiń jaǵasyn ustatty. Taspada qaskóiler tabiǵat qorǵaýshylaryn kóre sala, qasha jónelgen. Keiin anyqtalǵandai bet-júzin búrkegen tórt brakonerdiń ekeýi politsiia qyzmetkeri bolyp shyqty. Qazir arqar atqan ańshylar ustaldy.
«Shetpe aýylynyń tórt azamaty, árqaisynyń qolynda bir-birden myltyq bolǵan. Kólikti tekserý, qarý-jaraqty alý, oljalaǵan ónimniń hattamasy toltyrylyp, Mańǵystaý aýdanynyń politsiia bólimine tapsyryldy. Ishinde eki politsiia qyzmetkeri bar ekeni belgili boldy.
Tabiǵat qorǵaýshylarynyń málimetinshe, zańsyz ań aýlaýǵa shyqqan tártip saqshylary inspektorlardy sózge tartyp, jazadan qutylyp ketýge árekettengen», - dedi «Qyzylsai» memlekettik óńirlik tabiǵi parkiniń direktory Omar Sársenǵaziev.
Qaskóiler erekshe qorǵalatyn «Qyzylsai» tabiǵi parkiniń aýmaǵynda kólikpen emin-erkin júrgen. Tabiǵat qorǵaýshylary brakonerlerdi 100 shaqyrymdai qýyp júrip ustaǵan. Mamandardyń aitýynsha, kólikten tórt ańshy myltyǵy men jabaiy ańnyń eti tárkilengen. Qazir qyzyl kitapqa engen túz taǵysyn atqandarǵa qatysty qylmystyq is qozǵaldy.
