Bilim jáne ǵylym ministri Ashat Aimaǵambetov Jańaózen men Aqtaý qalalaryna jasalǵan saparynyń qorytyndysy boiynsha óńirdegi bilim berý salasyndaǵy qandai jumystar atqarylatynyn aitty, dep habarlaidy "Ult aqparat".
«Keshe jumys saparymen Mańǵystaý oblysyna bardym. Jańaózen men Aqtaý qalalarynda ornalasqan mektepter, balabaqsha, kolledj, ýniversitet jáne stýdenttik jataqhanalarda boldym.
№21 «Aizere» balabaqshasynyń jumysymen tanystym. Jańaózendegi №22 mekteptiń materialdyq-tehnikalyq jabdyqtarmen qamtylýyn, oqý kabinetterin, beinebaqylaý kameralarymen jáne dabyl túimelerimen jabdyqtalýyn tekserdim. Sondai-aq «Kaspii» kolledjiniń jumysymen tanystym.
Aqtaýda 1200 orynǵa shaqtalǵan jańa mekteptiń qurylysy júrip jatyr, nysandy osy jyldyń ortasyna qarai tapsyrý josparlanyp otyr. Sonymen qatar №29 mekteptiń irgesin keńeitý maqsatynda júrip jatqan japsarlas qurylystyń jumysymen tanystym. Bilim oshaǵynyń jaqynda salynǵanyna qaramastan, jańa turǵyn úi keshenderiniń boi kóterýine bailanysty aýdanda oqýshy oryndarynyń tapshylyǵy týyndady. Merdiger bir ai ishinde bul máseleniń ornyn toltyratyn keńeitý qurylysyn aiaqtaýǵa ýáde berdi.
Sondai-aq «Yessenov University» joǵary oqý ornyna baryp, akademiialyq artyqshylyq ortalyǵyn qurý jobasynyń prezentatsiiasymen tanystym. Oqý korpýsyn aralaýmen qatar stýdentter turatyn jataqhanaǵa baryp, ýniversitettiń jańa jataqhanasynyń qurylys barysymen tanystym. Joǵary oqý orny búkil óńir úshin kadrlar daiarlaityndyqtan, jyl saiyn oqýǵa jáne stýdentter kontingentine suranystyń ósýimen qatar stýdentterdi jataqhanamen qamtamasyz etý qajettiligi de artyp keledi», - dedi ol.
Ministrdiń sózinshe, osyndai saparlar barysynda tárbieshilermen, muǵalimdermen, mektep jáne kolledj direktorlarymen, sondai-aq JOO-nyń oqytýshylarymen tildesý óte mańyzdy.
«Mańǵystaý oblysynda da qalyptasqan dástúrge sai áriptestermen kezdesý ótkizip, barlyq ideia men usynystardy tyńdap, olardy tolǵandyrǵan nemese qyzyqtyrǵan suraqtarǵa jaýap berdim. Mektep direktorlarymen kezdesý barysynda óńirge pedagogterdi tartý, mamandardy daiarlaý jáne biliktiligin arttyrý boiynsha jańa joba talqylandy.
Sondai-aq Jańaózen qalalyq máslihatynyń depýtattarymen júzdesip, olardyń qaladaǵy bilim berýdi damytý jónindegi usynystaryn tyńdadym.
Arnaiy áleýmettik paket usynyp, túrli óńirlerden JOO-nyń úzdik túlekterin belsendi túrde tartatyn aimaqtardyń qataryna Mańǵystaý oblysy da kiretinin atap ótkim keledi. Muǵalimderdiń biliktiligin arttyrý boiynsha keshendi sharalardy júzege asyrý da mańyzdy. Ol úshin bilim berý uiymdarynyń direktorlaryna da, muǵalimderge de arnaiy kýrstar uiymdastyratyn bolamyz.
Óńir úshin oqýshy oryndarynyń tapshylyǵy máselesi de ózekti. Oqýshylar sany ótken jylmen salystyrǵanda 9,5 myń balaǵa artty. Suranys artqandyqtan, oblysta 24 mektep jáne jumys istep turǵan mektepterge qosymsha taǵy 11 japsarlas qurylys salynatyn bolady. Onyń ústine oblys ortalyǵynda ǵana emes, suranysqa sáikes Jańaózen qalasy men oblystyń basqa da aýdandarynda jańa ári zamanaýi mektepter boi kótermek. Budan bólek, erekshe bilim berýdi qajet etetin balalarǵa arnalǵan túzetý kabinetteri ashylady», - dedi Aimaǵambetov.
Onyń aitýynsha, oblysta qosymsha bilim berý júiesin damytý, balalarǵa arnalǵan jańa sektsiialar men úiirmeler ashý mańyzdy mindet bolyp tabylǵandyqtan, osy baǵytta jumys júrgizilmek.
«Oblysta shetel ýniversitetiniń filialyn ashý, jumys istep turǵan Sh.Esenov atyndaǵy ýniversitetti damytý, ýniversitette Akademiialyq utqyrlyq ortalyǵynyń ashylýy, oǵan oqý ǵimaraty men jataqhananyń salynýy, oblys mektepteriniń túlekterine elimizdiń jetekshi tehnikalyq joǵary oqý oryndarynda bilim alýy úshin qosymsha ataýly granttardyń bólinýi de basty mindetterdiń biri.
Sapar qorytyndysy boiynsha bizdiń sala úshin ózekti barlyq másele baqylaýǵa alynady jáne tiisti tapsyrmalar berildi», - dep jazdy ministr.
