Búgin Mańǵystaý oblysynyń ákimi Nurlan Noǵaev shahmattan ótken Álem chempionatynda jeńimpaz atanǵan Bibisara Asaýbaeva men onyń anasy ári bapkeri Liana Tańjaryqovany qabyldady, dep habarlaidy QazAqparat.
Oblys ákiminiń baspasóz qyzmetinen málim etkendei, óńir basshysy Mańǵystaý oblysynyń atynan óner kórsetip júrgen 17 jastaǵy Bibisarana aitýly jeńisimen quttyqtap, sáttilik tiledi.
«Bibisara Asaýbaevany eresekter arasynda blits boiynsha ótken Álem chempionatyndaǵy jarqyn jeńisimen quttyqtaimyn! Siz halyqaralyq básekede joǵarǵy sporttyq sheberlik tanytyp, elimizdiń jáne Mańǵystaý óńiriniń mereiin ústem ettińiz. Sizdiń shahmat boiynsha eń jas chempion atanýyńyz otandyq sport úshin tarihi oqiǵa dep esepteimin. Áli de alar asýlaryńyz kóp bolyp, tabystan tabysqa jete berýińizge tilektestik bildiremin», - dedi Nurlan Noǵaev.
Eske salaiyq, Bibisara Asaýbaeva Varshavada ótken Álem chempionatynda eresekter arasyndaǵy shahmattan Qazaqstan tarihyndaǵy alǵashqy altyn júldeni ielendi. Osylaisha, Bibisara shahmat tarihyndaǵy eń jas álem chempiony bolyp otyr.
Buǵan deiin Bibisara balalar men jasóspirimder sanattarynda 5 dúrkin álem chempiony jáne eki dúrkin álem vitse-chempiony atanǵan edi. Shahmat tarihyndaǵy eń jas Fide Master ataǵynyń iegeri. 2017 jyly «Álem quramasy» sapynda «Ǵasyr matchy» halyqaralyq týrniriniń jeńimpazy boldy. 2019 jyly Ýkrainada «Altyn Monǵoz» Halyqaralyq jyl syilyǵynyń nominanty jáne iegeri atandy.
Sondai-aq ol mańǵystaýlyq sportshylarǵa turaqty túrde sheberlik sabaqtaryn ótkizip, óńir shahmatshylarynyń qataryn kóbeitýge atsalysyp keledi.
