Qazaqstan densaýlyq saqtaý ministrliginiń boljamynsha, elde mamyrdyń sońyna deiin tórt myńdai adamǵa koronavirýs juǵady. Bul týraly 22 sáýirde ótken brifingte memlekettik bas sanitarlyq dárigeri Aijan Esmaǵambetova aitty, dep habarlaidy Azattyq.
“Qazir biz infektsiia taraýynyń shyrqaý shegindemiz. Boljamǵa sai, virýstyń ósýi jáne túsýin úsh aida, naýryz-mamyrda baqylaimyz. Sáýirdiń sońyna deiin 2700 adamǵa, mamyrdyń sońyna deiin 4000 adamǵa virýs juǵady degen boljam bar. Aldymyzda turǵan maqsat – kúndelikti ósimdi bes paiyzǵa, odan keiin bir paiyzǵa deiin tómendetý. Virýs juqtyrǵandar sanyn 4000 deńgeiinde ustaý úshin halyq karantin erejesin saqtaýy tiis” dedi ol.
22 sáýir 19.35-tegi málimetke sai, Qazaqstanda 2070 adamǵa virýs juqty. 515 adam dertten aiyqty. 19 adam qaitys boldy.
Esmaǵambetovanyń sózinshe, qazir elde virýs juqtyrǵan alty adamnyń hali óte aýyr, 21 adamnyń jaǵdaiy aýyr, 13 adamnyń jaǵdaiy ortasha aýyr. Virýs juqtyrǵandardyń 60 paiyzynda simptom az ia baiqalmaidy.
“Elde 652 medqyzmetkerden koronavirýs tabyldy. Olardyń ishinde keibiriniń jaǵdaiy ortasha. Aýyr halde jatqandar joq” dedi Esmaǵambetova.
Virýs juqtyrǵan medqyzmetkerlerdiń basym bóligi Almatyda – 375. Almatydaǵy ortalyq qalalyq klinikalyq aýrýhana virýs oshaǵyna ainalyp, qazir bul meditsina mekemesindegi jaǵdai boiynsha is qozǵalǵan.
Esmaǵambetova Qazaqstanda 250 myń medqyzmetker (onyń 72 myńy dáriger) baryn, elge 4 myńdai dáriger jetispeitinin aitty. Sózinshe, Qazaqstanǵa qosymsha 800 epidemiolog qajet. Elde qazir 16 myń medqyzmetker koronavirýspen kúreske jumylǵan.
Ministrlik ókili virýs juqtyrǵandarmen bailanysta bolǵan 39585 adamnyń 98 paiyzy – 38 myńnan astamy tabylyp, oqshaýlanǵan.
Osyǵan deiin Qazaqstan densaýlyq saqtaý ministriniń orynbasary Qamaljan Nadyrovtan koronavirýs tabylǵany habarlanǵan. Nadyrovtyń ózi aýrý jeńil ótip jatqanyn aitqan. Al Esmaǵambetovanyń sózinshe, densaýlyq saqtaý ministri Eljan Birtanov Nadyrovpen bailanysta bolmaǵan.
