Elbasy Nursultan Nazarbaev «Nur Otan» partiiasy Tóraǵasynyń birinshi orynbasary Baýyrjan Baibekti qabyldady, dep habarlaidy QR Tuńǵysh Prezidentiniń resmi saity.
Kezdesýde Elbasy tótenshe jaǵdai kezinde memlekettik sharalardy qoldaý jáne muqtaj adamdarǵa kómek uiymdastyrý boiynsha «Nur Otan» partiiasynyń belsendi jumysyn atap ótti.
– Pandemiia búkil adamzatqa qaýip tóndirip tur. Prezident pen Úkimet qiyn jaǵdaiǵa tap bolǵan adamdardy, kópbalaly otbasylardy, múmkindigi shekteýli jandar men qarttardy kómekpen qamtamasyz etý jóninde sharalar qabyldady. Osy oraida partiiaǵa memlekettik sharalardy qoldaý boiynsha belsendi jumys isteýdi tapsyrdym, - dedi Qazaqstannyń Tuńǵysh Prezidenti.
Sondai-aq Nursultan Nazarbaev «Birgemiz» qoǵamdyq qorynyń jumysyna toqtalyp, bul bastamany qoldaǵan qazaqstandyqtarǵa alǵysyn bildirdi.
– «Birgemiz» qoryna biraz qarajat jinaldy. Osynaý qiyn kezeńde muqtajdarǵa kómek uiymdastyrý maqsatymen meniń qor qurý jónindegi bastamamdy qoldaǵany úshin Qazaqstannyń biznes qaýymdastyǵyna alǵys aitqym keledi. Men «ERG» kompaniialar tobynyń basshylyǵy A.Mashkevichke, A.Ibragimovqa, P.Shodievke, «Qazaqmys» korporatsiiasynyń basshylyǵy V.Kimge, O.Novachýkke, E.Ogaiǵa, sondai-aq T.Qulybaevqa, B.Ótemuratovqa, R.Sársenovke, A.Klebanovqa, Ǵ.Esenovke, A.Raqymbaevqa, A.Belovichke, Q.Boranbaevqa, Q.Sháripbaevqa jáne taǵy da basqa azamattarǵa alǵys bildiremin, - dedi Elbasy.
Sonymen birge Qazaqstannyń Tuńǵysh Prezidenti «Jas Otan» jastar qanatynyń belsendileri men eriktileriniń jumysyn atap ótti.
– Partiia belsendileri men «Jas Otan» eriktileri Qazaqstan boiynsha 50 myńnan astam otbasyn eń qajetti taýarlarmen qamtamasyz etti. Jalpy bul jumysqa úsh myń erikti jumyldyryldy. Men olarǵa da alǵys aitamyn, - dedi Nursultan Nazarbaev.
Sonymen qatar, Elbasy «Birgemiz» qorynan 152 myńnan astam otbasyna 50 myń teńge kóleminde birjolǵy kómek kórsetilgenin aitty.
- Biz bul jumysty jalǵastyrýymyz kerek. Mamyr aiynyń basynan halyqqa kómek kórsetýdiń ekinshi tolqynyn bastaimyz. Bul - Úkimet bólip otyrǵan kómekten bólek qosymsha qoldaý, - dedi Qazaqstannyń Tuńǵysh Prezidenti.
Sondai-aq «Nur Otan» partiiasynyń Tóraǵasy daǵdarystan keiingi kezeńdegi ekonomikalyq ósimdi qamtamasyz etý máselelerine toqtaldy.
– Prezident te, Úkimet te osy qiyn ýaqytta bárine kómektesý úshin barynsha jumys istep jatyr. Koronavirýs pandemiiasy ótedi, aldaǵy ýaqytta bizdiń aldymyzda ekonomikany qaita qalpyna keltirý máselesi týyndaidy. Biraz adam jumyssyz qalyp, ekonomika báseńdedi. Jaǵdaidyń jaqsarýyna qarai biznestiń keibir túrlerine qyzmetin jandandyrý úshin jeńildik jasaǵan jón dep oilaimyn. Kásipkerler ózin jáne ainalasyn qorǵaý úshin barlyq tiisti sharalardy qabyldaýy kerek, - dedi Elbasy.
Óz kezeginde B.Baibek partiianyń daǵdarysqa qarsy is-sharalardy júzege asyrý jáne halyqqa kómek kórsetý jumystary týraly baiandady.
– Qazirgi tańda «Birgemiz» qoryna 20 milliard teńgege jýyq qarajat jinaldy. Biz materialdyq kómekten bólek Nur-Sultan, Almaty jáne Shymkent qalalaryndaǵy muqtaj otbasylarǵa meditsinalyq betperde tarata bastadyq. Sonymen qatar, elorda men Almatydaǵy eki myńnan astam dáriger men meditsina qyzmetkeriniń árqaisysyna Qordan 50 000 teńgeden berildi, - dedi «Nur Otan» partiiasy Tóraǵasynyń birinshi orynbasary.
Kezdesý sońynda Nursultan Nazarbaev taǵy bir márte barsha qazaqstandyqty jahandyq pandemiiamen kúreste birigýge shaqyrdy.
– Birligimiz, yntymaǵymyz ben bir-birimizge degen qamqorlyǵymyz bizdi jetistikke jeteleidi. Úide otyrý ońai emes ekenin túsinemin. Shaǵyn bizneske de aýyrtpalyq túsip tur. Alaida qazir jetistikke jetý úshin shydamdylyq qajet», - dedi Qazaqstannyń Tuńǵysh Prezidenti.
