Mamyr aiynda ekinshi deńgeili bankter men banktik emes jekelegen aiyrbastaý pýnkterinde jalpy salmaǵy 92,7 keli bolatyn 3 316 altyn quima satyldy, dep habarlaidy Ulttyq banktiń baspasóz qyzmeti.
Halyqqa tazartylǵan altyn quimalardy satý jáne satyp alý baǵdarlamasy 2017 jyly iske qosylǵan. Baǵdarlama qolǵa alynǵaly jalpy salmaǵy 3,2 tonnaǵa jýyq 94 545 altyn quima satyldy.
"Altyn quimalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda eń kóp suranysqa ie túri – 10 gramdyq altyn quima. Jalpy satylǵan quimalar arasynda onyń úlesi – 26%, iaǵni, 24 493 dana. Odan keiin 20 gramdyq quima kóp satylady – 20 385 dana (22%), 5 gramdyq quimadan 19 468 dana (20%), 100 gramdyq quimadan 18 679 dana (20%), 50 gramdyq quimadan 11 520 dana (12%) satyldy. Altyn quimalar Almaty, Nur-Sultan jáne Atyraý qalalarynda kóp satylady.
Quimalar senimdi investitsiia quraly bola alady. Altyn quimalar naryǵyndaǵy ótimdiliktiń basty kepili – bank pen banktik emes aiyrbastaý pýnkteri klientke aqshany sol kúni tólei otyryp, altyn quimalardy keri satyp ala alady" - delingen habarlamada.
Baǵdarlama bastalǵaly beri ekinshi deńgeili bankter men banktik emes jekelegen aiyrbastaý pýnkteri jalpy salmaǵy 330 keli 13 692 altyn quimany keri satyp alǵan, bul – jalpy satylǵan quimalardyń 14%-y. Keri satyp alynǵan altyn quimalardyń barlyǵy derlik Ulttyq Banktiń filialdary arqyly halyqqa satylady.
Ár quima qorǵaý elementterimen qaptalǵan (quimanyń aina beti, mikrotekst jáne jiegi bar) jáne arnaiy qorapta shyǵady, sol arqyly quimanyń ashylǵan-ashylmaǵanyn ońai tekserýge bolady. Qorǵanysh qoraby sapa sertifikaty da bola alady. Sondyqtan, altyn quimany uqyppen saqtap, qorabyn búldirmeý kerek.
Qazir altyn quimalardy ekinshi deńgeili bankterdiń eseptik kassa bólimderinde jáne banktik emes jekelegen aiyrbastaý pýnkterinde satyp alyp, keri satýǵa bolady.
