QR Premer-Ministri Asqar Maminniń tóraǵalyǵymen ótken Úkimet otyrysynda aýa-raiynyń qolaisyzdyǵyna bailanysty joldardaǵy jaǵdai qaraldy, dep habarlaidy "Ult aqparat" primeminister.kz saityna silteme jasap.
Ishki ister ministri E. Turǵymbaev osy jyldyń 16-22 jeltoqsan aralyǵynda elimizde 104 jol-kólik oqiǵasy tirkelip, solardyń saldarynan 39 adam qaza taýyp, 158 adam túrli dene jaraqattaryn alǵanyn aitty.
Aýa-raiy jaǵdailary joldardaǵy jaǵdaiǵa keri áserin tigizdi. Temperatýranyń nól gradýsqa deiin kúrt kóterilýi jáne sonyń saldarynan kóktaiǵaqtyń qalyptasýy, sonymen qatar jańbyr men qardyń jaýýynyń, tumannyń áserinen joldyń kórinýiniń shektelýi — qala syrtyndaǵy joldardaǵy apattylyqtyń artýyna ákelip soqty.
Ótken aptada politsiia tótenshe jaǵdailar bólimshelerimen jáne «Qazavtojol» UK» AQ-men birge 11 oblysta respýblikalyq jáne jergilikti mańyzy bar joldarda kólik quraldarynyń qozǵalysyn shektedi.
Jalpy uzyndyǵy shamamen 7,5 myń shaqyrym bolatyn respýblikalyq mańyzy bar joldardyń 57 ýchaskesi jabyldy (7,272 km).
Eń qiyn jaǵdai Shyǵys Qazaqstan, Aqtóbe, Jambyl jáne Batys Qazaqstan oblystarynda baiqaldy.
Ishki ister organdary kommýnaldyq qyzmettermen jáne jergilikti atqarýshy organdarmen birlesip, keptelisterdi joiý, joldardy tazartý, inertti materialdardy sebý, evakýatsiialaý jáne azamattarǵa shuǵyl kómek kórsetý sharalaryn oryndady.
Shamamen 1 myń avtomashina kepteliste qalǵan, barlyǵy qar qursaýynan 120-dan astam avtomashina men 900-den astam adam evakýatsiialandy. Evakýatsiialanǵan azamattar jaqyn mańdaǵy eldi mekenderde ornalasqan jylytý pýnktterine ornalastyryldy. Óńirlerde azamattarǵa kómek kórsetý úshin jedel shtabtar quryldy.
Adamdardy qutqarýǵa TJK-niń 200-den astam qyzmetkeri men 300 politsiia qyzmetkeri, 170 birlik qutqarý tehnikasy men politsiia mashinalary, sondai-aq jergilikti atqarýshy organdar men jol qyzmetteriniń arnaiy tehnikalary tartylǵan.
Qazirgi ýaqytta Shyǵys Qazaqstan, Atyraý, Aqmola, Qostanai, Qyzylorda, Pavlodar, Soltústik Qazaqstan jáne Túrkistan oblystarynda kúrdeli jaǵdai saqtalýda.
«Júrgizýshiler men jolaýshylardyń qaýipsizdigin qamtamasyz etý - óte mańyzdy másele. Taiaý ýaqytta, boljam boiynsha, alda borandar bolyp, aýa temperatýrasy tómendeidi. Barlyq qyzmetter buǵan daiyn bolýy kerek», — dedi A. Mamin.
Úkimet basshysy óńirlerdiń ákimdikterine joldarda jylytý jáne tamaqtandyrý pýnktterin uiymdastyrýǵa járdemdesýdi tapsyrdy.
«Indýstriia jáne infraqurylymdyq damý ministrligine jáne Qazavtojolǵa joldardy qardan jáne muzdan tazartýǵa tehnikany barynsha tartýdy tapsyramyn. QR IIM avtotrassalarda kezekshilik pen qaýipsizdikti qamtamasyz etý jumysyn jalǵastyrsyn», — dedi A. Mamin.
