QR Premer-Ministri Asqar Maminniń tóraǵalyǵymen ótken Úkimet otyrysynda QR Tuńǵysh Prezidenti Nursultan Nazarbaevtyń alǵashqy meditsinalyq-sanitariialyq kómek kórsetýdiń qoljetimdiligi men sapasyn jaqsartý jónindegi tapsyrmalaryn oryndaý barysy qaraldy, dep habarlaidy "Ult aqparat" primeminister.kz portalyna silteme jasap.
Premer-Ministr Densaýlyq saqtaý ministri E. Birtanov pen birqatar óńir ákimderiniń baiandamalaryn tyńdaǵannan keiin, QR Úkimetiniń aldynda halyqqa meditsinalyq kómektiń qoljetimdiligin qamtamasyz etý jáne onyń sapasyn jaqsartý — ortaq mindeti turǵanyn atap ótti.
«Bul qazaqstandyqtardyń densaýlyǵyn jaqsartyp, ómir súrý uzaqtyǵy men sapasyn arttyrady. Osy rette halyqtyń alǵashqy meditsinalyq kómekke qoljetimdiligi máselesi asa mańyzdy másele», — dep A. Mamin, atalǵan júiedegi problemalardy – alǵashqy býyn dárigerleriniń júktemesiniń aýyr ekenin jáne maman tapshylyǵy bar ekenin atap ótti.
Úkimet «Aýyl – El besigi» jobasy aiasynda jańa áleýmettik standarttardy engizip, aýyldyq jerlerde densaýlyq saqtaý uiymdarynyń qurylysy boiynsha óńirlik standarttar júiesin ázirleýde.
Úkimet basshysy mindetterdi iske asyrý maqsatynda Densaýlyq saqtaý ministrligine jáne óńirlerdiń ákimdikterine kelesi baǵyttar boiynsha jumysty uiymdastyrýdy tapsyrdy.
Birinshiden, jańa alǵashqy meditsinalyq-sanitariialyq kómek nysandaryn ashý arqyly jalpy praktika dárigerleriniń júktemesin azaitýdy qamtamasyz etý. Sonymen qatar, bul nysandar qajetti meditsinalyq quraldarmen jaraqtandyrylýy qajet.
Qaraǵandy oblysyndaǵy Kóktas aýyly jáne Jambyl oblysyndaǵy Grodekovo aýylynda tiimdi júzege asyrylǵan jobalar atap ótildi. Premer-Ministrdiń aitýynsha, endi osy oń tájiribe basqa da óńirlerde qoldanylýy kerek.
Ekinshiden, jas mamandardyń aýyldarda turaqty jumys istep, eldi mekenderde qalýyn qamtamasyz etý maqsatynda áleýmettik qoldaý kórsetý máselelerin pysyqtaý qajet.
Mysal retinde Soltústik Qazaqstan jáne Túrkistan oblystarynda jas mamandarǵa joǵary kóterme aqy tóleý, al Batys Qazaqstan jáne Qaraǵandy oblystarynda turǵyn úimen qamtamasyz etý jumysy uiymdastyrylǵany atalyp ótti. Premer-Ministr osyndai bastamalarǵa asa kóńil bólý kerek ekenin aitty.
Úshinshiden, Elbasynyń tapsyrmasyn tiimdi oryndaý maqsatynda Densaýlyq saqtaý ministrliginiń Alǵashqy meditsinalyq-sanitariialyq kómekti damytý boiynsha is-sharalar josparyn Úkimet deńgeiine kóterý kerek. Densaýlyq saqtaý ministrligine bir ai merzimde is-sharalardyń jandandyrylǵan josparyn ákimdiktermen pysyqtap, ony bekitý úshin Premer-Ministr Keńsesine engizý tapsyryldy.
