QR Premer-Ministri Asqar Mamin «Atameken» Ulttyq kásipkerler palatasynyń VI Sezine qatysty, dep habarlaidy "Ult aqparat" primeminister.kz saityna silteme jasap.
«Úkimet pen “Atameken” UKP Elbasy N. Nazarbaev pen Prezident Q. Toqaevtyń alǵa qoiǵan ekonomikanyń sapaly ósimin qamtamasyz etý jáne qazaqstandyqtardyń ál-aýqatyn arttyrý jónindegi strategiialyq mindetterin tiimdi iske asyrý úshin tyǵyz ózara is-qimyl ornatqan», — dedi A. Mamin.
Búginde elimizdiń belsendi turǵynynyń 30%-dan astamy shaǵyn jáne orta biznespen ainalysady. Ekonomikadaǵy ShOB úlesi 28,5% quraidy.
«Atameken» UKP-men birlesip, bizdiń aldymyzǵa atalǵan kórsetkishti 2025 jyly 35% deiin jetkizý jáne 2025 jylǵa qarai 50% deiin jetkizý jóninde strategiialyq mindet qoiylǵan. Ol úshin júieli jáne qurylymdyq sharalar kesheni qabyldanyp jatyr», — dedi A. Mamin.
Óńdeý ónerkásibi, otyn-energetika, agroónerkásip kesheni, týrizm, kólik jáne logistika salalarynyń investitsiialar tartýǵa úlken áleýeti bar.
«Biz otandyq biznesti atalǵan protsesterge belsene qatysýǵa shaqyramyz jáne qazaqstandyq ári sheteldik investorlar úshin qolaily jaǵdailar jasaýǵa tyrysamyz», — dedi A. Mamin.
Atqarylǵan jumystardyń arqasynda Qazaqstannyń Dúniejúzilik banktiń Doing Business reitingindegi pozitsiiasy 25 orynǵa deiin kóterildi. Biznes ahýaldy odan ári jaqsartý maqsatynda zańnamalyq bastamalardyń 8-paketi ázirlenýde. Ol bank shottaryn ashý, kásiporyndardy tirkeý, sonyń ishinde QQS tóleýshi retinde tirkeý rásimderin odan ári jeńildetýge, sondai-aq, minoritarlyq aktsionerlerdi qorǵaýdy kúsheitýge baǵyttalǵan.
«Kásipkerlerdiń adaldyq prezýmptsiiasy» qaǵidalary zańnamalyq túrde qoiylady. Barlyq belgisizdikter jáne áreket etip turǵan zańnamamen rettelmegen máseleler kásipkerlik sýbektisiniń paidasyna qarai túsindiriledi. Biznes pen azamattarǵa qosymsha mindetter júkteitin normalarǵa qatysty «ótpeli kezeń» qarastyrylǵan.
Úkimet basshysy «Biznestiń jol kartasy – 2020» memlekettik baǵdarlamasy iske asyrylǵan jyldary 2,5 trln teńge jalpy nesie somasyna 14 myńnan asa joba sýbsidiialanǵanyn atap ótti, tólengen sýbsidiialardyń jalpy kólemi 240 mlrd teńgeden asqan.
«Memlekettik baǵdarlamanyń tiimdiligin eskere otyryp, ony iske asyrý merzimi 2025 jylǵa deiin uzartylatyn bolady», — dedi A. Mamin.
Elbasynyń 5 áleýmettik bastamasyn iske asyrý aiasynda 24 myńǵa jýyq shaǵyn nesie berilgen. Nátijesinde, 22 myńnan asa adam jumyspen qamtyldy. «Bastaý-Biznes» jobasy boiynsha 3 jyl ishinde biznes júrgizý negizderine 88 myńnan asa adam oqytyldy. Qysqa merzimdi kásiptik oqytýmen qosymsha 300 myńǵa jýyq adam qamtylatyn bolady.
Premer-Ministr jergilikti qamtýdy damytý erekshe baqylaýda ekenin aitty, ishki naryqty qaýipsiz emes ári sapasyz ónimderden qorǵaý sharalary qabyldanýda, «qarapaiym zattar ekonomikasy» Jobalyq keńsesiniń fýnktsionaly arttyryldy, import almastyrý úshin 10 basymdyqty taýarlyq toptar anyqtaldy.
«Bul importtyń $5 mlrd-qa jýyq qysqarýyn qamtamasyz etýge, infliatsiia importyn jáne nesielerdiń paiyzdyq mólsherlemelerin azaitýǵa múmkindik beredi. Mundai jobalar úshin memleket barlyq qajetti qoldaý sharalarynyń paketin usynatyn bolady», — dedi A. Mamin.
Kásipkerlikti damytý kóbine-kóp óńirlik sipatqa ie. Osyǵan bailanysty Úkimet «Atameken» UKP-men birlesip óńirlerdegi ósý kózderin anyqtaý úshin eldik skrining júrgizdi. Búginde júiege respondentter týraly 1,8 mln-ǵa jýyq málimetter júktelgen. Saýalnama elimiz boiynsha 6 myń eldi mekende júrgizilip jatyr. Sonyń nátijesinde, memlekettik qoldaý sharalary «aýdandyq jáne aýyldyq okrýgter deńgeiinde» ázirlenetin bolady.
Úkimet basshysy mańyzdy mindet retinde qosylǵan quny asa joǵary shikizattyq emes taýarlardyń eksportyn arttyrý mindetin atady. Osy maqsattarda aldaǵy 3 jylǵa 500 mlrd teńge qarjy bólingen. Eksportty ártaraptandyrý úshin 7 taýarlyq top anyqtalǵan.
«Úkimet Qazaqstanda biznes júrgizý úshin eń qolaily jaǵdailardyń jasalýy úshin barlyq múmkindikterdi jasaidy. Biz biznes-ortany odan ári jetildirý boiynsha jumystardy jalǵastyramyz», — dedi A. Mamin.
