Reformalardyń jańa paketi – ekonomikany qysqa merzimdi perspektivada qalpyna keltirýge jáne elimizdiń ornyqty ári sapaly ekonomikalyq ósý jolyna shyǵýyna jaǵdai jasaidy. Bul baǵytta QR Premer-Ministri Asqar Mamin Úkimet otyrysynda tapsyrmalar berdi, dep habarlaidy QazAqparat.
«Memleketti basqarýdy damytýdyń 2030 jylǵa deiingi tujyrymdamasyn sapaly iske asyrý úshin Ulttyq ekonomika, Qarjy ministrlikteri Strategiialyq josparlaý jáne reformalar agenttigimen birlesip, 15 aqpanǵa deiin naqty is-qimyldar josparyn ázirlesin jáne Premer-Ministrdiń Keńsesine engizsin. Sonymen qatar, Ulttyq ekonomika ministrligine Aýmaqtyq damý josparynyń jańartylǵan jobasyn biylǵy 1 sáýirge deiin ázirleýdi tapsyramyn», - dedi A. Mamin Úkimettiń búgingi otyrysynda.
Premer-Ministr Qarjy, Ulttyq ekonomika ministrlikteri men Básekelestikti qorǵaý agenttigine eki aptada Jekeshelendirýdiń keshendi josparyn iske asyrý boiynsha kelisilgen usynystardy engizýdi tapsyrdy.
«Ulttyq ekonomika ministrligi múddeli memlekettik organdarmen jáne «Atameken» ulttyq kásipkerler palatasymen birlesip, ekonomikanyń sapaly jáne turaqty ósýin qamtamasyz etý jónindegi shuǵyl sharalar paketin pysyqtap, ony 8 aqpanǵa deiin Premer-Ministrdiń Keńsesine engizip, Ekonomikalyq ósýdi qalpyna keltirý jónindegi memlekettik komissiianyń kelesi otyrysynda qaraýǵa shyǵarsyn. Sonymen qatar, Qairat Nematuly (Kelimbetov – red.) biyl ótkiziletin halyq sanaǵyn sapaly júrgizý maqsatynda bir kún merzimde meniń tiisti ókimimniń jobasyn engizýdi tapsyramyn. Reformalardyń jańa paketi – ekonomikany qysqa merzimdi perspektivada qalpyna keltirýge jáne elimizdiń ornyqty ári sapaly ekonomikalyq ósý jolyna shyǵýyna jaǵdai jasaidy. Osy baǵytta jumysty jalǵastyramyz», - deidi A. Mamin.
Buǵan deiin Úkimet basshysy ulttyq basymdyqtar, ulttyq jobalar jáne 2025 jylǵa deiin damý jospary týraly tapsyrmalar bergen edi.
