QR Premer-Ministri Asqar Mamin beinekonferentsiia bailanysy rejiminde QR Parlamenti Májilisiniń tóraǵasy, fraktsiia basshysy Nurlan Nyǵmatýlin ótkizgen «Nur Otan» partiiasy fraktsiiasynyń otyrysyna qatysty.
Bul týraly QR Úkimetiniń resmi saity habarlady.
«Nur Otan» partiiasynyń tóraǵasy, QR Tuńǵysh Prezidenti – Elbasy Nursultan Nazarbaevtyń tapsyrmasy boiynsha «Ózgerister joly: árkimge laiyqty ómir!» partiianyń sailaýaldy baǵdarlamasyn júzege asyrý jónindegi jol kartasy ázirlendi. Memleket basshysy Qasym-Jomart Toqaev sailaýaldy baǵdarlamanyń ýaqytyly ári tiimdi oryndalýy boiynsha sharalar qabyldaýdy tapsyrdy», — dedi Mamin qujatty depýtattarǵa tanystyra otyryp.
Jol kartasy Sailaýaldy baǵdarlamanyń tórt baǵytyn iske asyrý boiynsha 362 is-sharany qamtidy: «Barshaǵa teń múmkindikter», «Ziiatker, salamatty jáne yjdaǵatty ult», «Ekonomika men óńirlerdiń turaqty damýy», «Halyqqa esep beretin memleket jáne jaýapty azamattar». Turǵyn úi qurylysynyń kólemin, onyń ishinde jeńildikti áleýmettik turǵyn úi kólemin ulǵaitý, áielder kásipkerligin, mektepke deiingi jáne orta bilim berýdi damytý arqyly qazaqstandyq otbasylardy qoldaý men nyǵaitý boiynsha júieli sharalar iske asyrylatyn bolady.
Úkimet qalalar men aýyldardyń infraqurylymyn odan ári damytý jáne jańǵyrtý, respýblikalyq joldardy rekonstrýktsiialaý jáne jol boiyndaǵy servispen qamtamasyz etý jóninde sharalar qabyldaidy. Sapaly jáne ornyqty ekonomikalyq ósim teńgerimdi makroekonomikalyq saiasat, ekonomikany odan ári ártaraptandyrý, investitsiialardy targettelgen tartý jáne eksportty proaktivti ilgeriletý esebinen qamtamasyz etiletin bolady.
Halyqty jumyspen qamtýdy saqtaý jáne ulǵaitý jónindegi keshendi sharalar iske asyrylady. Jyl saiyn jumyspen qamtýdyń belsendi formalarymen keminde 700 myń adam qamtylatyn bolady. 2025 jylǵa qarai barlyq kórsetiletin memlekettik qyzmetter avtomattandyrylyp, elektrondy formatqa kóshiriledi. «Jol kartasynyń ázirlengen jobasy «Nur Otan» partiiasynyń «Ózgerister joly: árkimge laiyqty ómir!» sailaýaldy baǵdarlamasyn tolyq ári sapaly iske asyrý jónindegi barlyq qajetti sharalardy qamtidy.
Úkimet barlyq is-sharalardyń ýaqytyly oryndalýyn qamtamasyz etedi. Barlyq sharalardy iske asyrýdyń nátijesi jańa shynaiylyq jaǵdaiynda halyqtyń turmys sapasy men ál-aýqatynyń naqty artýy bolady», — dedi A. Mamin. Premer-Ministr sóz sóilegen soń Úkimet músheleri depýtattardyń «Nur Otan» partiiasynyń sailaýaldy baǵdarlamasyn iske asyrýdyń túrli aspektileri týraly suraqtaryna jaýap berdi.
.jpeg)