QR Premer-Ministri Asqar Mamin Qazaqstanǵa resmi saparmen kelgen Mońǵoliia Premer-Ministri Ýhnaagiin Hýrelsýhpen kelissózder ótkizdi. Bul týraly primeminister.kz habarlaidy.
Taraptar saýda-ekonomikalyq, tranzittik-kólik, aýyl sharýashylyǵy, taý-ken, mádeni-gýmanitarlyq salalardaǵy yntymaqtastyqty odan ári damytý, sondai-aq aimaqtyq jáne halyqaralyq uiymdar aiasyndaǵy ózara is-qimyl máselelerin talqylady .
«Qazaqstannyń Tuńǵysh Prezidenti N. Nazarbaevtyń saiasatynyń arqasynda Qazaqstan-Mońǵol qatynastarynyń ilgerilemeli damýynyń negizi qalandy. Prezident Q. Toqaev syrtqy saiasattaǵy sabaqtastyqty ustana otyryp, Mońǵoliiamen yntymaqtastyqty tiimdi damytýǵa basa mán beredi», — dedi A. Mamin.
Óz kezeginde, Ý. Hýrelsýh Qazaqstannyń Aziiadaǵy jáne jalpy halyqaralyq arenadaǵy bedelin atap ótti.
«Biz halyqtarymyz ben memleketterimiz arasyndaǵy yntymaqtastyqty odan ári damytýǵa jáne ony sapaly jańa deńgeige shyǵarýǵa qyzyǵýshylyq tanytamyz», — dedi ol.
Úkimet basshylary ózara taýar ainalymyn odan ári arttyrýdyń mańyzdy áleýetin atap ótti, ol 2018 jyly $80 mln qurady. Taý-ken ónerkásibindegi, qurylys, mal sharýashylyǵynyń daiyn ónimin, kashemir, bylǵary shyǵarý jáne qaita óńdeý, tranzittik-kólik salasyndaǵy yntymaqtastyqty tereńdetý, sondai-aq, halyqaralyq avtomobil tasymaldary úshin qolaily jaǵdai jasaý týraly ShYU kelisimi aiasynda eki el arasyndaǵy qatynasty jandandyrýdy qosa alǵanda, ózara is-qimyl keleshegine erekshe kóńil bólindi.
A. Mamin Qazaqstan Respýblikasy men Mońǵoliianyń 2021-2024 jyldarǵa arnalǵan saýda-ekonomikalyq yntymaqtastyǵyn belsendirý jónindegi Jol kartasynyń jobasyn ázirleýdi usyndy.
«Saýda-ekonomikalyq yntymaqtastyqty qos taraptan da arttyrý arqyly ekijaqty saýdanyń barlyq áleýetin ashý qajet. Qazaqstandyq tarap Mońǵoliia naryǵyna Qazaqstannan jetkizile alatyn 100 áleýetti taýardy qamtyǵan tizimdi ázirledi», — dedi QR Premer-Ministri.
A. Mamin Nur-Sultannyń Ulan-Batyrmen qarym-qatynasyndaǵy mańyzdy bailanystyrýshy faktor Mońǵoliiadaǵy qazaq diasporasy ekenin atap aitty — 120 myńnan astam qazaqtyń 90 myńy Baian-Ólgei aimaǵynda turady. Premer-Ministr turaqty negizde birlesken mádeni jáne sporttyq is-sharalar ótkizý, shyǵarmashylyq ujymdarmen jáne ǵylymi mekemelermen almasý qajettigin aitty. Úkimet basshysy aldaǵy eki jylda Qazaqstanda Mońǵoliianyń Mádeni kúnderin jáne Mońǵoliiada osyndai kúnderdi ótkizýdi, sondai-aq, Ólgei qalasynda Abai Mádeni ortalyǵyn ashý múmkindigin qarastyrýdy usyndy.
Kelissózder qorytyndysy boiynsha eki eldiń Úkimet basshylarynyń qatysýymen kelesi birqatar qujattarǵa:
- Qazaqstan Respýblikasy men Mońǵoliia arasyndaǵy 1993 jylǵy 22 qazandaǵy azamattyq jáne qylmystyq ister boiynsha ózara quqyqtyq kómek týraly kelisimshartqa ózgerister engizý týraly hattamaǵa;
- terrorizmge qarsy kúres salasyndaǵy yntymaqtastyq týraly úkimetaralyq kelisimge;
- Qazaqstan Respýblikasynyń Bilim jáne ǵylym ministrligi men Mońǵoliianyń Bilim, mádeniet jáne ǵylym ministrligi arasyndaǵy bilim berý, ǵylymi dárejeler men ataqtar týraly qujattardy ózara moiyndaý týraly Kelisimge;
- Qazaqstan Respýblikasynyń Bilim jáne ǵylym ministrligi men Mońǵoliianyń Bilim, mádeniet jáne ǵylym ministrligi arasyndaǵy 2008 jylǵy 6 tamyzdaǵy bilim berý salasyndaǵy yntymaqtastyq týraly Kelisimge ózgerister men tolyqtyrýlar engizý týraly hattamaǵa;
- Qazaqstan Respýblikasy Aýyl sharýashylyǵy ministrliginiń Veterinarlyq baqylaý komiteti men Bas veterinarlyq basqarma – Mońǵoliia Úkimetiniń Atqarýshy agenttigi arasyndaǵy veterinarlyq baqylaý men qadaǵalaý salasyndaǵy memorandýmǵa;
- Nur-Sultan qalasy men Ulan-Batyr qalasynyń arasyndaǵy baýyrlastyq qatynastardy ornatý týraly kelisimge;
- Mońǵoliianyń ósimdik sharýashylyǵy jáne eginshilik institýty men A. Baraev atyndaǵy ǵylymi-óndiristik astyq sharýashylyǵy ortalyǵy arasyndaǵy yntymaqtastyq týraly kelisimge qol qoiyldy.
Mońǵoliia úkimeti basshysynyń Qazaqstanǵa resmi sapary aiasynda eki eldiń iskerlik toptary ókilderiniń qatysýymen Qazaqstan-Mońǵoliia biznes-forýmyn ótkizý, «Astana» halyqaralyq qarjy ortalyǵy men Halyqaralyq jasyl tehnologiialar ortalyǵyna barý josparlanǵan.
