QR Premer-Ministri Asqar Maminniń tóraǵalymen ótken selektorlyq otyrysta Qazaqstan Respýblikasynyń 2020-2024 jyldarǵa arnalǵan áleýmettik-ekonomikalyq damý boljamy jáne 2020 jylǵa arnalǵan respýblikalyq biýdjeti, sondai-aq QR Prezidenti Qasym-Jomart Toqaevtyń biylǵy 31 naýryzdaǵy tapsyrmalaryn iske asyrý aiasyndaǵy daǵdarysqa qarsy sharalardyń qosymsha toptamasy qaraldy.
Ulttyq ekonomika ministri R. Dálenov, Premer-Ministrdiń birinshi orynbasary – qarjy ministri Á. Smaiylov, eńbek jáne halyqty áleýmettik qorǵaý ministri B. Nurymbetov baiandama jasady. Óńirlerdegi ahýal jáne jumyspen qamtýdy qoldaý sharalary týraly Nur-Sultan qalasynyń ákimi A. Kólginov, Almaty jáne Túrkistan oblystarynyń ákimderi A. Batalov pen Ó. Shókeev baiandady, dep habarlaidy "Ult aqparat" primeminister.kz portalyna silteme jasap.
Úkimet basshysy basym mindet jumyspen qamtý ekenin atap ótti.
«Jańa «Jumyspen qamtýdyń jol kartasyn» qarjylandyrý 1 trln teńgege ulǵaityldy, bul 240 myńnan asa jańa jumys ornyn qurýǵa múmkindik beredi, buǵan jobalar iske asyrylatyn kezde qurylatyn ýaqytsha jumys oryndary ǵana emes, turaqty jumys oryndaryn qurý da kiredi.
Jumyspen qamtý jol kartasyn iske asyrý infraqurylymdy jańǵyrtý men tiimdi aktivterdi qurýdyń negizi bolýy tiis, olar bolashaqta ósý men damýǵa negiz bolady», — dedi A. Mamin.
Premer-Ministr kásipkerlerdi qoldaý úshin salyqtyq jeńildikter qabyldanǵanyn aitty. Olar ekonomikanyń túrli salalaryn qamtidy, onyń ishinde: saýda, qoǵamdyq tamaqtandyrý, qonaq úi jáne týristik biznes, sondai-aq qyzmet kórsetý sektorynyń basqa da salalary bar. Salyqtan bosatý jáne mólsherlemelerdi tómendetý túrli merzimge jáne 700 myńnan astam kásipkerlik sýbektisine qoldanylady.
Áleýmettik tólemderdi alýshylardyń qatary artady, onyń ishinde jumysynan aiyrylǵan ózin-ózi jumyspen qamtyǵandar, sondai-aq halyqtyń áleýmettik jaǵynan álsiz keibir toptary bar. Shamamen 3 mln qazaqstandyq 42500 teńge mólsherinde tólemaqy alatyn bolady.
Kóp balaly otbasylarǵa, jumyssyzdarǵa turaqty negizde turmystyq azyq-túlik jiyntyǵy tegin beriletin bolady. Bul sharamen 800 myńnan asa adam qamtylady.
Úkimet basshysy ákimderge múddeli memlekettik organdarmen birlesip, jańa Jumyspen qamtý jol kartasyn ýaqytyly ári tiimdi iske asyrýdy, áleýmettik qoldaýdyń barlyq túrlerin tóleýdi qamtamasyz etýdi tapsyrdy.
«Prezident Qasym-Jomart Toqaevtyń tapsyrmasy boiynsha Úkimet áleýmettik-ekonomikalyq damý boljamyn ázirledi. Respýblikalyq biýdjettiń jobasy daǵdarysqa qarsy sharalardy tolyq kólemde iske asyrýǵa múmkindik beredi. Memleket basshysynyń barlyq tapsyrmalary qajetti qarjylandyrýmen qamtamasyz etilip, ýaqytyly oryndalatyn bolady», — dedi A. Mamin.
