QR Premer-Ministri Asqar Mamin infektsiialyq aýrýhanalar men bastapqy meditsinalyq-sanitariialyq kómek uiymdaryndaǵy jeke qorǵanysh quraldary men koronavirýsqa qarsy dárilerdiń qoryna reviziia júrgizýdi tapsyrdy, dep habarlaidy QazAqparat.
«Epidemiologiialyq jaǵdaidy eskerip, óńirlerdegi jaǵdaidy turaqtandyrý úshin shuǵyl sharalar qabyldaý qajet. Osyǵan bailanysty mynadai tapsyrma beremin. Birinshi. Densaýlyq saqtaý ministrligi ákimdiktermen birge meditsina uiymdarynyń 1 aqpannan bastap halyqty jappai vaktsinalaýdy bastaýǵa daiyn bolýyn qamtamasyz etsin. Egý pýnktterinde vaktsinany saqtaýǵa arnalǵan qajetti jabdyq bolýy tiis. Sonymen birge meditsina qyzmetkerlerin oqytý qajet. Bir apta merzimde egý pýnktteriniń ázirligin jáne vaktsinamen turaqty qamtamasyz etý máselelerin sheshýdi tapsyramyn», - dedi Asqar Mamin Úkimet otyrysynda.
Ekinshiden, Úkimet basshysy óńirlerdiń ákimderine epidemiologiialyq jaǵdai nasharlaityn bolsa, shekteý sharalaryn qabyldaýdy, halyq pen biznes sýbektileriniń belgilengen sanitariialyq normalaryn qatań saqtaýyn qamtamasyz etýdi tapsyrdy.
«Sonymen qatar bir apta merzimde infektsiialyq aýrýhanalar men bastapqy meditsinalyq-sanitariialyq kómek uiymdaryndaǵy jeke qorǵanysh quraldary men koronavirýsqa qarsy dárilerdiń qoryna reviziia júrgizsin. Úshinshi. Ishki ister ministrligi ákimdiktermen birge monitoring toptarynyń jumysyn kúsheitsin. Aqparat ministrligimen birge túsindirý jumystaryn kúsheitý qajet. Óńirlerde baqylaý men sanitariialyq-epidemiologiialyq normalardyń qatań saqtalýy qamtamasyz etilsin. Eraly Luqpanuly, jalpy baqylaý sizde», - dedi Asqar Mamin orynbasary Eraly Toǵjanovqa qarata.
