QR Premer-Ministri Asqar Mamin Investitsiialyq yntymaqtastyqty damytý máseleleri boiynsha dialog alańy sheńberinde Eýropalyq odaqqa múshe memleketterdiń diplomatiialyq missiialarynyń basshylarymen kezdesti, dep habarlaidy "Ult aqparat" primeminister.kz saityna silteme jasap.
Úkimet basshysy Qazaqstannyń jahandyq ekonomikalyq daǵdarys pen pandemiia jaǵdaiynda ekonomikany odan ári damytýdy qamtamasyz etý boiynsha qabyldap jatqan sharalary týraly aitty.
«Qazaqstannyń 2025 jylǵa deiingi Strategiialyq damý jospary ázirlendi. Ol óńdeý ónerkásibi men aýyl sharýashylyǵynda qosylǵan quny joǵary eksportqa baǵdarlanǵan óndiristerdi ulǵaitý, jedeldetilgen tsifrlandyrýdy júrgizý, densaýlyq saqtaý júiesin nyǵaitý, infraqurylymnyń sapasy men qoljetimdiligin jaqsartý jónindegi sharalardy, sondai-aq basqa da aspektilerdi kózdeidi», – dedi A.Mamin.
Premer-Ministr Eýropalyq odaq elshilerin Qazaqstannyń EO-men saýda-ekonomikalyq jáne investitsiialyq yntymaqtastyǵyn qoldaý boiynsha odan ári ashyq jáne belsendi dialogqa shaqyrdy.
Óz kezeginde EO elshisi Sven-Olov Karlsson, Germaniia elshisi Tilo Iohanes Klinner, Niderlandy elshisi Andre Karstens Qazaqstan ekonomikasynyń turaqtylyǵyn jáne QR Úkimeti qabyldaǵan daǵdarysqa qarsy sharalardyń júieliligin atap ótti.
Taraptar pandemiia saldaryn eńserý jáne ekonomikany qalpyna keltirý máseleleri boiynsha Qazaqstannyń Eýropalyq odaqpen yntymaqtastyǵynyń perspektivalaryn talqylady. Densaýlyq saqtaý salasyndaǵy ózara is-qimyl, «jasyl ekonomikany» damytý jáne klimattyń ózgerýine qarsy kúres, AÓK, óńdeý ónerkásibi, kólik, energetika, infraqurylymdyq qurylys salalarynda birlesken investitsiialyq jobalardy iske asyrý máseleleri qaraldy. Biylǵy 1 naýryzda kúshine engen Qazaqstan men EO arasyndaǵy Keńeitilgen áriptestik pen yntymaqtastyq týraly kelisimdi keshendi iske asyrýǵa erekshe nazar aýdaryldy. Bul qujat saýdany, investitsiiany, innovatsiialardy jáne infraqurylymdyq damýdy qosa alǵanda, 29 salany qamtidy.
Kezdesýge QR Úkimetiniń músheleri, «Atameken» UKP, «Kazakh Invest» UK» AQ, «Báiterek» UBH», «QazAgro» UBH» basshylyǵy, Eýropalyq Odaqtyń, Germaniia, Niderlandy, Belgiia, Rýmyniia, Estoniia, Polsha, Shvetsiia, Italiia, Slovakiia, Ispaniia, Litva, Horvatiia, Chehiia, Gretsiia, Bolgariia, Finliandiia, Vengriia, Frantsiia elshileri, Portýgaliia, Avstriia, Latviia ókilderi jáne t. b. qatysty.
EO Qazaqstannyń negizgi investorlarynyń biri jáne iri saýda seriktesi bolyp otyr. Aǵymdaǵy jyldyń 8 aiynda taýar ainalymy 15,5 mlrd dollardy qurady.
