Premer-Ministr Asqar Mamin 10 shildege deiin «Bilim berý uiymdarynda balalardyń qaýipsizdigin qamtamasyz etý jónindegi jol kartasyn» bekitýdi tapsyrdy, dep habarlaidy "Ult aqparat".
«Bilim berý obektilerinde qolaily ári qaýipsiz orta qalyptastyrý – bizdiń basym mindetterimizdiń biri. Mektepterde tekserý júrgizý barysynda terrorizmge qarsy qaýipsizdikti buzý faktileri anyqtaldy. Oqý oryndaryn kásibi kúzetpen qamtamasyz etý, týrniketter, «dabyl túimeleri» men kameralar ornatý jumysynyń uiymdastyrylý deńgeii jetkiliksiz. Kásipqoi kúzetpen qamtamasyz etilgen mektepterdiń eń kóbi Nur-Sultan jáne Almaty qalalarynda, Qaraǵandy, Soltústik Qazaqstan oblystarynda. Al Shyǵys Qazaqstan oblysynda mektepterde ornatylǵan kameralar talaptarǵa tolyq sáikes keledi», - dedi Mamin Úkimettiń búgingi otyrysynda.
Premer-Ministr oqý oryndarynyń qaýipsizdigin qamtamasyz etý jumysyn aitarlyqtai jandandyrý qajettigin basa aitty. Sonymen birge óńirlerde balalarǵa qatysty jáne balalar arasyndaǵy quqyq buzýshylyqtar profilaktikasyn salaaralyq úilestirýdi kúsheitý talap etiledi.
«Osyǵan orai, óńirlerdiń ákimdikteri jańa oqý jyly bastalǵansha bilim berý uiymdaryn qaýipsizdiktiń materialdyq-tehnikalyq quraldarymen qamtamasyz etsin. Bul ishki ister organdarynyń jedel den qoiý ortalyǵyna shyǵatyn beinebaqylaý júielerin jańartýǵa, kásibi kúzetpen, týrnikettermen jáne «dabyl túimelerimen» qamtamasyz etýge qatysty. Ekinshi, Bilim ministrligi múddeli memlekettik organdarmen birge biylǵy 10 shildege deiin Bilim berý uiymdarynda balalardyń qaýipsizdigin qamtamasyz etý jónindegi jol kartasyn bekitsin», - dep tapsyrma berdi Úkimet basshysy.
Sonymen birge, Bilim, Mádeniet, Densaýlyq saqtaý, Ishki ister ministrlikteri biylǵy 20 shildege deiin terroristik turǵydan osal vedomstvolyq obektilerdiń terrorizmge qarsy qorǵalýyn uiymdastyrý jónindegi nusqaýlyqty bekitýi qajet.
«Bilim, Ishki ister, Tótenshe jaǵdailar ministrlikteri men óńirlerdiń ákimdikteri biylǵy shildeniń sońyna deiin tótenshe jaǵdailar týyndaǵan kezdegi personal men oqýshylardyń is-qimyl algoritmin bekitsin. Sonymen qatar oqý oryndarynda únemi terrorizmge qarsy oqý-jattyǵý ótkizip turý kerek. Óńirlerdiń ákimdikteri qiyn balalarmen júrgiziletin jumys boiynsha mektep psihologtary men kámeletke tolmaǵandar isi jónindegi inspektorlardy úilestirýdi kúsheitý qajet. Óńir ákimderi oqý oryndarynyń qaýipsizdigi máselelerin erekshe baqylaýǵa alsyn», - dedi Asqar Mamin.
