QR Premer-Ministri Asqar Maminniń tóraǵalyǵymen ótken Úkimet otyrysynda áleýmettik mańyzy bar azyq-túlik taýarlarynyń baǵasyn turaqtandyrý sharalary qaraldy, dep habarlaidy "Ult aqparat" primeminister.kz saityna silteme jasap.
Baǵa monitoringi jáne áreket etý sharalary boiynsha atqarylyp jatqan jumystar týraly QR saýda jáne integratsiia ministri B. Sultanov, aýyl sharýashylyǵy ónimderin óndirýshilerdi qoldaý jáne áleýmettik mańyzy bar azyq-túlik ónimderin shyǵarý týraly QR aýyl sharýashylyǵy ministri S. Omarov, kóterme saýda naryqtaryn damytý strategiiasy, QR-daǵy agro-logistikalyq jáne kóterme-taratý ortalyqtary týraly Qazaqstandaǵy ADB óńirlik ókildiginiń direktory D. Kappanelli baiandady.
2019 jyly áleýmettik mańyzy bar azyq-túlik taýarlaryna baǵanyń ósýi 10,4%-dy qurady, barlyq óńirlerde shekti baǵadan asyp ketýdiń 67 jaǵdaiy tirkelgen.
QR saýda jáne integratsiia ministrligi ázirlegen baǵany turaqtandyrý jónindegi sharalar paketi áleýmettik mańyzy bar azyq-túlik ónimderin óndirý kólemin ulǵaitýdy, monopoliiaǵa qarsy zańnama sharalarymen saýdanyń ústeme baǵasyn kelisýdi boldyrmaýdy, baǵa monitoringine jurtshylyqty tartýdy, elektrondyq saýdany damytýdy, taýardy ótkizý infraqurylymyn qurýdy jáne ónimdi saqtaý men tiimdi bólý úshin qajetti jaǵdailardy jasaýdy qamtidy.
Osy jyldyń 15 qańtarynda QR Premer-Ministri janynan Kóterme-taratý jáne agro-logistikalyq ortalyqtar jelisin damytý jónindegi jańa jobalyq ofis quryldy, ol apta saiyn múddeli memlekettik organdardyń, qarjy institýttary men naryq ókilderiniń qatysýymen otyrystar ótkizedi.
«QR Tuńǵysh Prezidenti – Elbasy Nursultan Ábishuly Nazarbaev bizdiń aldymyzǵa qazaqstandyqtardyń tabysy men turmys sapasyn arttyrýdy qamtamasyz etý týraly strategiialyq mindet qoidy. Osyǵan bailanysty áleýmettik mańyzy bar taýarlarǵa baǵany turaqtandyrý máselesi óte mańyzdy. Úkimettiń keńeitilgen otyrysynda Memleket basshysy Qasym-Jomart Kemeluly Toqaev osy baǵytta júieli sharalardy qabyldaýdy tapsyrdy», — dedi A. Mamin.
Úkimet basshysy ótken jyldyń qarasha aiynda baǵany turaqtandyrý jónindegi jumystaǵy olqylyqtar úshin óńirler ákimderiniń birqatar orynbasarlary jaýapkershilikke tartylǵanyn eske saldy. Qabyldanǵan sharalardyń qorytyndysy boiynsha jeltoqsan aiynda ákimdikter baǵany ustap turý boiynsha oń ózgeristerge qol jetkizdi. Máselen, ótken jyldyń qarasha aiynda áleýmettik mańyzy bar azyq-túlik taýarlaryna baǵanyń jiyntyq ósimi 1,1%-dy qurasa, jeltoqsanda bar bolǵany 0,1%-dy qurady.
«Bul óńirlerde osy baǵytta jumys isteý úshin qajetti quraldar bar ekenin kórsetedi. Sonymen qatar, qańtar aiynyń qorytyndysy boiynsha biz taǵy da áleýmettik mańyzy bar taýarlar baǵasynyń 0,3%-ǵa ósýin baiqap otyrmyz», — dep A. Mamin, ákimder baǵa máselesin erekshe baqylaýda ustap, jaǵdaidyń ózgerýine jedel áreket etý kerektigin atap ótti.
Premer-Ministr Saýda jáne integratsiia ministrligine Qarjy, Aýyl sharýashylyǵy ministrlikterimen birlesip, bir apta ishinde kóterme-taratý jáne agro-logistikalyq ortalyqtar júiesin qurý jónindegi jobalardy qarjylandyrý qurylymyn anyqtaýdy tapsyrdy.
«Aýyl sharýashylyǵy ministrligi men ákimdikter áleýmettik mańyzy bar azyq-túlik taýarlarynyń óndirisin keńeitý úshin qajetti jaǵdai jasaýy kerek. Ishki naryqty otandyq azyq-túlikpen tolyqtyrý aýyl sharýashylyǵy taýaryn óndirýshilerdiń sýbsidiia alý kezindegi mindetteriniń biri bolýy tiis», — dep túiindedi A. Mamin.
