QR Premer-Ministri Asqar Mamin Almaty qalasyna jumys sapary barysynda Almaty oblysynyń áleýmettik-ekonomikalyq damý máseleleri jóninde keńes ótkizdi.
Óńir ákimi Amandyq Batalov Almaty oblysyn damytýdyń ózekti máseleleri týraly baiandady, dep habarlaidy "Ult aqparat" Úkimettiń resmi saityna silteme jasap.
Talqylaýǵa Premer-Ministrdiń birinshi orynbasary Álihan Smaiylov, Strategiialyq josparlaý jáne reformalar agenttiginiń tóraǵasy Qairat Kelimbetov, Ulttyq ekonomika ministri Áset Erǵaliev, Energetika ministri Nurlan Noǵaev, Ekologiia, geologiia jáne tabiǵi resýrstar ministri Maǵzum Myrzaǵaliev, Saýda jáne integratsiia ministri Baqyt Sultanov, Densaýlyq saqtaý ministri Aleksei Tsoi, Indýstriia jáne infraqurylymdyq damý birinshi vitse-ministri Qaiyrbek Óskenbaev, Qarjy birinshi vitse-ministri Berik Sholpanqulov, Mádeniet jáne sport vitse-ministri Ǵabidolla Ábdirahymov qatysty.
Kólik jáne turǵyn úi infraqurylymyn damytý, týrizm jáne investitsiialar tartý, qorshaǵan ortany qorǵaý, óńirde «Aýyl – El besigi» jobasyn iske asyrý máseleleri qaraldy.
2030 jylǵa deiingi Almaty aglomeratsiiasyn damytýdyń óńiraralyq is-sharalar josparyn iske asyrý máselesine erekshe nazar aýdaryldy. 2020 jyldyń qorytyndysy boiynsha oblysta ónerkásip óndirisiniń kólemi 2019 jylmen salystyrǵanda 2,3%-ǵa, 1,3 trln teńgege deiin, onyń ishinde óńdeý ónerkásibi 2,7%-ǵa (mashina jasaý 31%-ǵa, farmatsevtika 10%-ǵa, tamaq ónimderi 3,5%-ǵa, sýsyndar 2,3%-ǵa, qaǵaz óndirisi 1,1%-ǵa) ósti. Aýyl sharýashylyǵynyń jalpy ónimi 2,3% ósimmen 917,8 mlrd teńgege jetti. Aýyl sharýashylyǵy daqyldarynyń egistik alqaptary 6,9 myń gektarǵa ulǵaiyp, 968,5 myń ga qurady. Mal basy 5,1%-ǵa artty, et jáne sút óndirisi tiisinshe 2,2%-ǵa jáne 3,2%-ǵa ósti. Negizgi kapitalǵa salynǵan investitsiialar 4%-ǵa 680,7 mlrd teńgege deiin ósti. Qurylys jumystarynyń kólemi 310,2 mlrd teńgeni qurady (+6,8%), 957 myń sharshy metrden astam turǵyn úi paidalanýǵa berildi (+6,9%).
Búgingi tańda oblystyń investitsiialyq portfeline 44 myńnan astam jańa jumys oryndaryn qura otyryp, 5,4 trln teńgege 546 joba kiredi. Biyl 3 myńnan astam jańa jumys ornyn asha otyryp, 118 mlrd teńgege 62 jobany iske asyrý josparlanýda. Almaty oblysynyń Ile aýdanynda jalpy qýaty jylyna 220 myń tonna bolatyn eki qoqys óńdeý zaýytynyń qurylysy bastalady. 2020 jyly týrizm salasyndaǵy negizgi kapitalǵa salynǵan investitsiialar 21 mlrd teńgeni qurady, bul respýblikalyq kólemniń 14,5%-yn quraidy. Biyl oblysta 685 km týristik marshrýt pen soqpaqtardy abattandyrý, 2,6 mlrd teńge somasyna týristerdi ornalastyratyn 18 oryndy paidalanýǵa berý josparlanǵan.
«Almaty oblysy ekonomikasynyń negizgi sektorlarynda oń damý dinamikasy saqtaldy. Óńir AÓK, kólik jáne logistika, týrizm jáne ónerkásip salalarynda eleýli áleýetke ie. Oblys Almaty qalasynyń azyq-túlik beldeýi bolyp sanalady. Jańa jobalarǵa salynatyn investitsiialar kólemin arttyrý arqyly Almaty oblysyn odan ári damytýǵa edáýir serpin berý qajet», — dedi A. Mamin.
