QR Premer-Ministri Asqar Mamin Almaty qalasyna jumys sapary barysynda qalanyń áleýmettik-ekonomikalyq damýy máseleleri jóninde keńes ótkizdi, dep habarlaidy "Ult aqparat" QR Úkimetiniń resmi saityna silteme jasap.
Almaty qalasynyń ákimi Baqytjan Saǵyntaev jáne onyń orynbasarlary baiandama jasady. Talqylaýǵa Premer-Ministrdiń birinshi orynbasary Álihan Smaiylov, Strategiialyq josparlaý jáne reformalar agenttiginiń tóraǵasy Qairat Kelimbetov, Ulttyq ekonomika ministri Áset Erǵaliev, Energetika ministri Nurlan Noǵaev, Ekologiia, geologiia jáne tabiǵi resýrstar ministri Maǵzum Myrzaǵaliev, Saýda jáne integratsiia ministri Baqyt Sultanov, Densaýlyq saqtaý ministri Aleksei Tsoi, Indýstriia jáne infraqurylymdyq damý birinshi vitse-ministri Qaiyrbek Óskenbaev, Qarjy birinshi vitse-ministri Berik Sholpanqulov, Mádeniet jáne sport vitse-ministri Ǵabidolla Ábdirahymov qatysty.
Injenerlik, kólik jáne turǵyn úi infraqurylymyn damytý, bilim berý jáne densaýlyq saqtaý, kásipkerlik jáne investitsiialar tartý, qorshaǵan ortany qorǵaý jáne Almaty qalasyn gazdandyrý máseleleri qaraldy. Almaty aglomeratsiiasyn damytý jáne 2020-2024 jyldarǵa arnalǵan «Jańa Almaty» keshendi josparyn iske asyrý máselelerine erekshe kóńil bólindi.
«Almaty qalasy eldiń JIÓ-niń besten bir bóligin qamtamasyz ete otyryp, áleýmettik-ekonomikalyq damý kórsetkishteri boiynsha óńirler arasynda jetekshi orynǵa ie. Megapolistiń odan ári aitarlyqtai damý áleýeti bar. Jańa jumys oryndaryn qurý, qala turǵyndarynyń ómir súrý sapasy men ál-aýqatyn arttyrý, infraqurylymdy jáne jalpy alǵanda Almaty aglomeratsiiasynyń ekonomikasyn damytý úshin barlyq jaǵdaidy jasaý qajet», — dedi A. Mamin.
Úkimet basshysy barlyq josparlanǵan jobalardy ýaqytyly jáne sapaly júzege asyrýdy, sondai-aq Almaty qalasyn odan ári damytýǵa investitsiialar tartýdy qamtamasyz etýdi tapsyrdy.
2020 jyldyń qorytyndysy boiynsha Almaty qalasynda ónerkásip óndirisiniń kólemi 2019 jylmen salystyrǵanda 4,6%-ǵa 1,052 trln teńgege deiin ósti, onyń ishinde óńdeý ónerkásibi 6,9%-ǵa (mashina jasaý 35,8%-ǵa, farmatsevtika 43,5%-ǵa, qaǵaz óndirý 95,6%-ǵa, jeńil ónerkásip 5 ese) artty. Negizgi kapitalǵa salynǵan investitsiialar 17,2%-ǵa 971,2 mlrd teńgege deiin ósti. Qurylys jumystarynyń kólemi 402,7 mlrd teńgeni qurady (+10,6%), 2,4 mln sharshy metrden astam turǵyn úi paidalanýǵa berildi (+14%). 2021-2024 jyldary Almaty qalasynda 35,4 myń jańa jumys ornyn qura otyryp, jalpy quny 4,5 trln teńge bolatyn 201 investitsiialyq jobadan turatyn pýl quryldy. Biyl 7 myńnan astam jumys ornyn asha otyryp, 187,9 mlrd teńgege 92 jobany iske asyrý josparlanýda.
Jumys sapary aiasynda A. Mamin Almaty qalasynyń turǵyn úi infraqurylymy qurylysynyń barysyn tekserdi, sondai-aq Qazaqstan men Ortalyq Aziiadaǵy asa iri «SmArt.Point» kovorking ortalyǵyn aralady, onda AT, qarjy tehnologiiasy, onlain-saýda, baǵdarlamalyq qamtamasyz etýdi ázirleý, kiberqaýipsizdik, blokchein, AT-bilim berý, media, avtomattandyrylǵan logistika, jasandy zerde, robotty tehnika jáne t. b. salalardaǵy 60-tan astam kompaniia usynylǵan.
