QR Premer-Ministri Asqar Mamin áleýmettik mańyzy bar azyq-túlik ónimderine shekti baǵanyń ósýine jol bermeýdi tapsyrdy, dep habarlaidy "Ult aqparat" QR Úkimetiniń resmi saityna silteme jasap.
Saitta QR Premer-Ministri Asqar Maminniń tóraǵalyǵymen QR Prezidenti janyndaǵy Tótenshe jaǵdai rejimin qamtamasyz etý jónindegi memlekettik komissiianyń kezekti otyrysy ótkendigi habarlanǵan.
«Elimizdegi sanitarlyq-epidemiologiialyq ahýal týraly densaýlyq saqtaý ministri E. Birtanov, halyqty azyq-túlikpen qamtamasyz etý týraly aýyl sharýashylyǵy ministri S. Omarov, áleýmettik mańyzy bar taýarlar baǵasyn retteý týraly saýda jáne integratsiia ministri B. Sultanov baiandady.
Baiandamalarda Qazaqstanda túrli azyq-túlik taýarlarynyń jetkilikti qory bar ekeni aityldy. Qor únemi toltyrylyp otyrady, sondyqtan olardyń tapshylyǵy bolmaidy»,-dilengen habarlamada.
Jiynda Úkimet basshysy Aýyl sharýashylyǵy ministrligine óńirlerdiń ákimdikterimen birlesip, belgili bir taýar túrleriniń týyndaýy múmkin tapshylyǵyna der kezinde áreket etý úshin azyq-túlik qoryna, onyń óndirisiniń teńgerimine jáne óńiraralyq tasymalyna kún saiyn monitoring júrgizýdi tapsyrdy.
«Biz 9-dan asa áleýmettik mańyzy bar azyq-túlik taýarlarynyń shekti baǵasyn bekittik. Baǵany ustap turýdyń tiisti tetigi bar. Degenmen birqatar óńirde birden keibir azyq-túlik ónimderine shekti baǵanyń ósýi baiqalyp otyr. Ákimdikterge mundai faktilerge jol bermeýdi jáne osy máseleni jeke baqylaýǵa alýdy tapsyramyn «, — dedi A. Mamin.
Premer-Ministr óńirlik turaqtandyrý qorlarynda azyq-túliktiń qajetti qoryn qamtamasyz etýdi tapsyrdy.
Buǵan qosa otyrysqa qatysýshylar tótenshe jaǵdai kezinde iri indýstriialyq jobalardy júzege asyrý, aqparattyq tehnologiialar salasynda qyzmetterdi qamtamasyz etý jáne t. b. máselelerin qarady.
