«Daryn» respýblikalyq ǵylymi-praktikalyq ortalyǵynyń direktory Timýr Nurkeshov mamandandyrylǵan bilim berý uiymdaryna qabyldaý konkýrsy týraly túsindirdi, dep habarlaidy QazAqparat.
«2022-2023 oqý jylyna mamandandyrylǵan bilim berý uiymdaryna qabyldaý konkýrsy daryndy balalarǵa arnalǵan 71 mektepte iske asady. Úmitkerlerdiń qujattaryn qabyldaý aǵymdaǵy jyldyń 1 naýryzy men 1 sáýiri aralyǵynda www.qabyldau.daryn.kz portaly arqyly júrgiziledi. Konkýrs «Daryn» ortalyǵy belgilegen merzimde bekitilgen kestege sáikes 15 – 30 sáýir aralyǵynda ótedi. Mamandandyrylǵan bilim beretin uiymdary 5, 6, 7 synyptyń oqýshylaryn qabyldaidy», - dedi Nurkeshev Ortalyq kommýnikatsiialar qyzmetinde.
Besinshi synyp oqýshylary 40 suraqqa jaýap beredi:
- matematika jáne logika – 30 suraq,
- oqý saýattylyǵy – 10 suraq.
Testileýge bólingen ýaqyt – 60 minýt.
Altynshy synyp oqýshylary 60 suraqqa jaýap beredi:
- matematika jáne logika – 35 suraq;
- oqý saýattylyǵy – 15 suraq;
- Qazaqstan tarihy – 10 suraq.
Testileýge bólingen ýaqyt – 90 minýt.
Jetinshi synypqa túsetinder 75 suraqqa jaýap beredi:
- matematika jáne logika – 55 suraq;
- oqý saýattylyǵy – 10 suraq;
- Qazaqstan tarihy – 10 suraq.
Testileýge bólingen ýaqyt – 120 minýt.
Budan bólek ol «Myń bala» olimpiadasy boiynsha aýyl mektepteriniń oqýshylaryna bólingen kvota sany 10%-dy quraitynyn aitty.
«Mamandandyrylǵan mektepte bilim alatyn bastaýysh synyp oqýshysy orta mektepke emtihansyz ótedi. Irikteý konkýrsy elektrondy formatta ótkiziledi. Oqýshylardy mamandandyrylǵan mektepterge qabyldaýdyń ashyqtyǵyn, ádildigin qadaǵalaý úshin elektrondy platformanyń kómegimen proktoring júiesi qoldanylady. Ǵimaratta, aýditoriialarda jáne konkýrstyq irikteý ótkiziletin oryndarda beinebaqylaý jáne aýdio jazba júielerin qamtamasyz etemiz», - dedi Timýr Nurkeshov.
