Búgin Astana qalalyq ekinshi sotynda aiyptalýshy Malika Muhitova sońǵy sózin sóiledi, dep habarlaidy Sputnik Qazaqstan tilshisi.
Búgin sotta sońǵy sózin sóilegen Malika Muhitova marqum Eskendir Súleimenovtiń ata-anasynan taǵy bir márte keshirim surady.
"Qudaidyń sol kúni meni emes, ony alyp ketkenine kináli emespin. Qoldaryńyzdan kelse, meni keshirýdi ótinemin… Bul qanshalyqty qiyn ekenin túsinemin. Men bulai bolǵanyn shyn júrekten qalamap edim. Taǵy da qaitalap aitamyn, eger men ony der kezinde kórgende, qaiǵyly oqiǵaǵa jol bermes úshin barlyq sharany qolǵa alatyn edim. Ótinemin, raqymshyl bolyńyzdar, mende eshqashan mundai maqsat bolǵan emes. Sol kúndi esh ýaqytta umytpaimyn. Sol kúnnen bastap búkil ómirim ózgerdi", — dep kózine jas aldy sottalýshy.
Malika anasy ár juma saiyn shelpek pisirip, Eskendirdiń jany o dúniede tynyshtyq tapsyn dep jalbarynatynyn aitty.
"Bulai bolǵanyn qalaǵan joqpyn. Eger sizderde bir tamshydai túsinistik bolsa, taǵy bir márte ótinemin, meni keshirińizdershi", — dep jylady ol.
Aiyptalýshy osydan eki ai buryn marqum onyń túsine kirgenin aitty.
"Aq kiimmen jaǵajai mańynda júgirip júr eken. Maǵan qarap kúlimsiredi, bir kishkentai qyzben oinap júrdi. Sol sátte men onda bári jaqsy shyǵar dep oiladym", — deidi Malika.
Sottalýshy Eskendirdiń ata-anasynan ony bas bostandyǵynan aiyrmaýdy surady.
"Áke-sheshemdi, týǵan-týysqandarymdy, ata-ájemdi aiańyzdarshy. Ótinemin, keshirińizder, meni bas bostandyǵymnan aiyrmańyzdarshy", — dedi Malika Muhitova.
Eske sala ketsek, belgili aqyn, jazýshy Oljas Súleimenovtiń nemeresi 27 jastaǵy Eskendir Súleimenov Astanada jol apatynan kóz jumǵan edi. Jol apaty Máńgilik el – Kerei Jánibek handar kósheleriniń qiylysynda bolǵan. Jas jigit mototsikl júrgizip kele jatqan. Eskendir Súleimenovti Qyzylorda oblysy ishki ister departamentiniń bastyǵy, politsiia polkovnigi Qairat Muhitovtiń qyzy Malika Muhitova qaǵyp ketken. 29 jastaǵy Malika Muhitova ótken aptada ótken sot otyrysynda marqumnyń ata-anasynan jylap keshirim surady. Óziniń kinásin tolyǵymen moiyndap, zardap shekken tarapqa materialdyq shyǵyndy tóleýge daiyn ekenin málimdedi.
24 qazanda ótken sot otyrysynda zardap shekken tarap sottalýshydan 14 million teńge mólsherinde materialdyq shyǵyn óndirýdi talap etken edi. Alaida keiin marqumnyń otbasy ol talap-aryzdy qaitaryp aldy.
9 qarashada ótken jaryssóz barysynda memlekettik aiyptaýshy Álisher Baraev aiyptalýshy Malika Muhitovany eki jylǵa bas bostandyǵynan aiyrýdy jáne úsh jyl kólik júrgizýge tyiym salýdy suraǵan edi.
Búgin marqumnyń ata-anasy qazaqstandyqtarǵa úndeý jasap, sottalýshynyń shyn ókingenine senbeitinine aitty.
