Bas prokýratýra mal urlyǵy úshin jazanyń qalai kúsheitiletinin túsindirdi, dep habarlaidy "Ult aqparat".
Bas prokýrordyń orynbasary Marat Ahmetjanovtyń aitýynsha, jańa zań jobasyna "mal urlyǵy" degen bólek bap engizilip otyr. Ol qylmys úshin basqa qylmys túrlerine qaraǵanda jaza qatal bolady.
"Qazir mal urlaý kásipke ainalǵan. Ony, kóbinese, top bolyp, aldyn ala sóz bailasyp, qora-jaiǵa buzyp kirip jasaidy. Ondai urlyqta uiymdastyrýshy, qasapshy, tasymaldaýshy, jalǵan qujat jasaityndar, bazarda alypsatarlar bolady. Ókinishke qarai, bul qylmysqa qamqorshylyq jasaityn sheneýnikter men quqyq qorǵaý organdary da bar. Osynyń bári júieli jolǵa qoiylǵan qylmys bolyp ketti", - dedi Ahmetjanov senattyń plenarlyq otyrysynda.
Onyń sózine qaraǵanda, endi osy qylmysta "teris qylyq" pen "ortasha aýyr qylmys" degen anyqtama bolmaidy. Zań jobasy boiynsha qomaqty aiyppul men 5 jylǵa deiin bas bostandyǵynan aiyrý jazasy qarastyrylǵan. Al iri mólsherde adamdar tobymen aldyn ala sóz bailasyp jasalsa, 7 jylǵa deiingi jaza bolady.
"Birneshe ret nemese mal-qoraǵa kirip jasalsa, 10 jyl. Asa iri kólemde jáne qylmystyq top bolsa, 12 jylǵa deiin bas bostandyǵynan aiyrý kózdelip otyr", - dep atap kórsetti Ahmetjanov.
Aita keteiik, senatorlar qylmystyq zańnamany jetildirýge arnalǵan zań jobasyn birinshi oqylymda maquldady.
