100 jylqyny urlady dep sotqa tartylyp, keiin raqymshylyqqa ilikken Rahat Sársenovtyń isine qatysty mal dárigeri da óz nusqasyn aitty, dep habarlaidy ult.kz.
Ol Rýslan Ótepbaiǵa bergen suhbatynda 60 bas maldyń joǵalǵanyn rastaityn qujatqa qalai qol qoiǵanyn túsindirdi.
Mal dárigeriniń aitýynsha, ol qujatqa maldyń joǵalǵanyn rastaitynyn bile tura qol qoimaǵan. Onyń sózinshe, ózi bul qujatty ekpe salynǵan maldyń sany kórsetilgen qaǵaz dep túsingen. Orys tilin tolyq túsinbegendikten jáne qojalyqqa malǵa ekpe jasaý úshin barǵandyqtan, naqty qandai qujatqa qol qoiǵanyn ańǵarmaǵan.
Al Tájiǵali Eleýovtiń aitýynsha, Rahat Sársenov uzaq jyldar boiy qojalyqta jumys istegen. Ol Sársenovtiń araq ishkenine jáne buǵan deiin birneshe jylqynyń joǵalýyna kóz juma qaraǵanyn, alaida sońǵy jaǵdaidan keiin quqyq qorǵaý organdaryna júginýge májbúr bolǵanyn aitty.
Eleýov bul iske bir adamnyń ǵana emes, qylmystyq toptyń qatysy bolýy múmkin ekenin málimdedi. Onyń sózinshe, kúdiktilerdiń biri qazirgi tańda sot úkimimen jazasyn ótep jatyr.
Sondai-aq Tájiǵali Eleýov áleýmettik jelide taraǵan «Rahat Sársenov tolyq aqtaldy» degen aqparattyń shyndyqqa sáikes kelmeitinin aitty.
«Bireýler ony áleýmettik jelide qaralym jinaý úshin “baidan zábir kórgen qaharman” retinde kórsetip otyr», – dedi ol.
Osylaisha, is boiynsha taraptardyń aitqandary bir-birinen erekshelenip otyr. Mal dárigeri qujatqa onyń mazmunyn tolyq túsinbei qol qoiǵanyn aitsa, qojalyq ókili maldyń joǵalýyna qatysty ózge de adamdardyń qatysy bolýy múmkin ekenin alǵa tartty.
