Foto: depositphotos.com
Ulytaý oblysynyń prokýratýrasy asyrap alǵan balalaryn azaptaǵan áielge qatysty málimdeme jasady, dep habarlaidy "Ult aqparat" Stan.kz aqparat agenttigine silteme jasap.
Oblystyq prokýratýranyń málimetinshe, sottalýshy Sadyqova 2018 jyly sharýa qojalyǵynyń iesi retinde mal baǵýshylarǵa tólenetin jalaqyny únemdeý maqsatynda balalar úiinen 3 kámeletke tolmaǵan balany, naqtyraq aitsaq, 2 aǵaiyndy ul bala men 1 qyz balany asyrap alǵany anyqtalǵan.
Sottalýshy zań talaptaryn elemei jáne patronattyq kelisimniń mindetterin oryndamai balalardy aýyr úi sharýasymen ainalysýǵa, sondai-aq Jezqazǵan qalasynyń aýmaǵynda metall synyqtaryn jinaýǵa májbúrlegen. Eger baǵynbaǵan nemese jumysty durys atqarmaǵan jaǵdaida sottalýshy Sadyqova balalardy uryp-soǵý arqyly fizikalyq jáne psihikalyq azapqa ushyratqan.
Joǵaryda atalǵan faktilerdiń barlyǵy sotqa deiingi tergeýde jáne sot otyrysy barysynda dálelendi.
"Kámeletke tolmaǵandardyń isteri jónindegi mamandandyrylǵan aýdanaralyq sottyń 2024 jylǵy 11 shildedegi úkimimen R.J.Sadyqova kámeletke tolmaǵandardy azaptaý jáne qorǵanshy ókilettigin asyra paidalanǵany úshin kináli dep tanylyp, 4 jylǵa bas bostandyǵynan aiyryldy", – delingen habarlamada.
Eske salaiyq, buǵan deiin Ulytaý obylysy turǵynynyń asyrap alǵan balalaryn bes jyl boiy quldyqta ustaǵany týraly jazǵan edik.
