Kollaj: Ulysmedia.kz
Ulttyq ekonomika ministri Álibek Qýantyrov maqtanǵandy jaqsy kóretin qazaqstandyqtar quny joǵary múlikti satyp alsa, olarǵa sán-saltanat salyǵy salynýy múmkin ekenin aitty, - dep habarlaidy Massaget.kz portaly.
Senattaǵy Úkimet saǵatynan soń BAQ ókili ministrge "Qazaqstandyqtar maqtanǵandy jaqsy kóredi. Sondai ádet bar. Mysaly, turǵyn kredit alyp, iahta satyp aldy deiik. Osy jaǵdaida onyń múlikine sán-saltanat salyǵy salyna ma?" dep suraq qoidy.
Álibek Qýantyrov múliktiń qalai satyp alynǵany emes, onyń quny eskeriletinin aitty.
"Árine, sán-saltanat salyǵy (quny joǵary) múlikke jáne taǵy basqa obektilerge salynady. Sondyqtan onyń múlikti qalai satyp alǵany mańyzdy emes. Aqshaǵa nemese nesiege aldy ma? Bastysy ol múlkin tirkep, jyljityn nemese jyljymaityn múlikke salyǵyn tóleýi kerek", - dedi ministr.
Ol iPhone satyp alǵandar qazaqstandyqtar bul salyqty tólemeitinin atap ótti.
"Biz qymbat zattar týraly aityp turmyz. Mysaly, 200 myń dollar turatyn kólik. Eger ol nesiege satyp alynsa, onda sán-saltanat salyǵy tólenýi tiis. Al eń qymbat iPhone 1,5 myń dollar turady ǵoi", - dedi vedomstvo basshysy.
Álibek Qýantyrov sán-saltanat salyǵy naqty qandai múlikke salynatynyna toqtaldy.
"100 million teńge turatyn avtomobildi alaiyq. Bul jaǵdaida kólik salyǵyna qosymsha sán-saltanat salyǵyn tóleisiz. Qymbat jyljymaityn múlik satyp aldyńyz, bul jaǵdaida da sán-saltanat salyǵyn tóleisiz. Biz salyqtyq mólsherin talqylap jatyrmyz. Jyljymaityn múliktiń shkalasy bar. Tek onyń esepteý ádistemesi basqasha bolady. Túsindireiin. Adamnyń 5 páteri bar, árqaisysy ortasha eseppen 10 million teńge turady. Endi bul páterler jeke eseptelmeidi, olardyń jalpy quny 50 million teńge bolady. Sonymen qatar adam 200-300 million teńgege kólik satyp alsa nemese ony alý úshin kredit alsa da, sán-saltanat salyǵyn tóleidi", - dedi ministr.
